Vusumuzi Dube
Zimpapers Sports Hub
IHIGHLANDERS ingena umango omude ngempelaviki isiyahlasela egumeni leZPC Kariba kumdlalo lapho uMason Mushore asewuvulele amehlo, ethembisa ukuthi uzalithela emambuleni. Uzizwa elokuzethemba okuphezulu lumdlali, njalo uyazi ukuthi yena labanye bakhe eqenjini kumele badonse amasokisi, badlalele ukuphuma lemiklomelo yonke enkundleni yeNyamhunga. I-ZPC Kariba liqembu elilomkhuba wokuyivimbezela iHighlanders.
UMason, ongumdlali wesiswini uthe ukudlala kwakhe lezinsuku kungenxa yokungenela kukaNkulunkulu kunye lokusebenza nzima.
Umdlali lo usebeyinsika yokuqina kweqembu enkabeni yenkundla kusukela athola indawo yokudlala kumasizini adluleyo. Maviki wonke, uyaba sukumisa abalandeli njalo akula osolayo ngendlela adlala ngayo. Ulichaya ibhola kuthokoze abanengi. Ababukeli benguqu asebeke bambona bavumelana ukuthi uMason uyingitshi ekuthwaliseni nzima amanye amathimu. Kubonakele lokhu ngesikhathi ethwalise nzima abadlali beFC Platinum ngeSonto edluleyo lapho aphinde wenelisa ukuhlohla “umvema” webhola, kwaduma inkundla.Nxa ezabe ekhona emdlalweni weZPC Kariba, uMason ukhangelele ukuthi alithele emambuleni.
Umdlali lo, odlala lomfowabo uMcKinnon, ubike njalo ukuba uhlose ukuhlohla amabhola ayisitshiya galombili kulisizini. Ukuze akwenelise lokhu, uthe uzaqina ngomthandazo lokulandela izixwayiso zomqeqetshi uKelvin Kaindu.
“Enginga kutsho nje yikuthi ngithola isibusiso esivela kuNkulunkulu. Impumela yokudlala kwami ivela ekuqeqetsheni kanzima lokulalela izicebiso zomqeqetshi,” kutsho uMason. Kukhangelelwe ukuthi umdlali lo abalelwe kulabo abangathola isicoco seBusiness Friends of Bosso Player of the Month esisekelwa ngemali inyanga zonke ngosomabhizimusi bakoBulawayo uMgcini Nkolomi, Phathisani Nkomo loTitus Mbongendlu. Usehlohle amabhola amabili kumidlalo elitshumi lanye.
Wahlohla elakuqala kulisizini lapho iBosso idibene leTriangle eGibbos Stadium, waphinda elinye ngempelaviki edluleyo beleFC Platinum.
Lokhe wafika kuBosso, uMason usehlohle amabhola amane. Imidlalo yeCastle Lager ingena kuviki letshumi lambili ngoMgqibelo langeSonto.
Imidlalo ekhona kulimpelaviki:
NgoMgqibelo
FC Platinum v Bikita Minerals (Maglas); TelOne FC v Yadah FC (Ascot); ZPC Kariba v Highlanders (Nyamhunga); Herentals College v Ngezi Platinum (Rufaro); Simba Bhora v Triangle United (Wadzanayi); Manica Diamonds v Scottland (Sakubva); Chicken Inn v Greenfuel (Luveve); MWOS v Kwekwe United (Ngoni)
NgeSonto
Dynamos v CAPS United (Rufaro)
Online Reporter