admin
Ncekwenhle Ncube
ZILOKHE zibabaza njalo zikhuza umhlolo izakhamizi zeGokwe ngemva kokuba usomabhizimusi engcwabele umkakhe phakathi kwendlu yokukhonza iAnglican Church eGokwe ngempelaviki.
UMnumzana Lazaraus Muyambi ongusomabhizimusi omkhulu kulindawo kubikwa uthe kuyisifiso sakhe ukuthi umkakhe angcwatshelwe endlini yokukhonzela ngoba kulapho okwakulenhliziyo yakhe. Kubikwa ukuthi uMuyambi wafaka imali enengi ekwakhiweni kwesakhiwo lesi kungakho-ke ukubone kufanele ukuthi enze lokhu.
Abakade bekhona lokhu kusenzakala babike ukuthi usomabhizimusi lo olesikolo, iHealing School kanye lamabhizimusi amanengi kulindawo wenze into emangalise abantu abanengi.
Ingcwaba ligejwe phakathi kwendlu uNkosikazi Muyambi wasengcwatshelwa phakathi.
Kubikwa UMnu Muyambi uthe kungumkhuba webandla ukuthi umuntu oyenze kuhle ebandleni wazinikela kiyo yonke imisebenzi kaNkulunkulu angcwatshelwe phakathi kwendlu yokukhonzela.
Ngemva komngcwabo obukhona ngoMgqibelo kube yindaba ekhulunywe yizizalwane zakule indawo kukanti lasebulenjini bekukhulunywa ngalindaba.
UMthunywa uxhumane loNkosikazi Tatenda Manyewu oyisakhamuzi sakule indawo ochaze ukuthi selokhe wathwetshulwa yingwe okunje kakaze akubone noma akuzwe kuyikho nje lalamhlanje indaba le ilokhu isematheni abantu.
“Silapha silokhe sihlahle amehlo. Mina okunje ngiyakuqabuka ukuthi umuntu angcwatshelwe endlini yokukhonzela. Abantu bazakhonza njani lesidumbu phakathi kwenkonzo.
“Ngibona ukuthi njengoba kuyibo abakha indlu le yikho befuna ukuthi kukhale esabo isicathulo. Noma kunjalo inkosi izangenela,” kuchaza uNkskz Manyewu
Imbiko ethunyezwe ngabantu ebulenjini ibichaza ukuthi uMnu Muyambi udle ngamandla esikhwama ukuze athathele ibandla isinqumo sokuthi umkakhe angcwatshelwe phathi kwendlu yokukhonzela.
Omunye umfakazi othande ukuvela ngokuthi nguMusa nje kuphela uthe ibandla leRoma kumbe iAnglican liyakuvumela ukwenziwa umkhuba ofana lalowu. Uthe okwenza abantu behlahle amehlo ngalokhu kakwazi kumbe kubangelwa yikuthi lo ongcwatshwe ngempelaviki ngumuntu omnyama.
Esinye isakhamuzi esingathandanga ukuvezwa igama sithe lokhu kululaza amasiko abo. Uthe bakhangelele ukuthi inkokheli zomdabu zisukume zivikele isizwe ngoba kulihlazo njalo kulakho ukuvala izulu.
UMnumzana Izwi Muyambi indodana kamuyi walile ukukhuluma ngaloludaba ngoba ethi banengi abantu abahluphayo mayelana lalokhu kodwa ngokwesiko leSonto yabo kuqondile.
Imizamo yokuxhumana loMnu Muyambi ngokwakhe yehlule.
Online Reporter