admin
UJOEL “Josta” Ngodzo umdlali kanobhutshuzwayo oligiqa ekuqembu leCaps United uthi uzaqhubeka ngokuncedisa ukuphakamisa leliqembu ukuze lenze kahle kumqhudelwano weConfederation of African Football Champions Legaue ngomnyaka ozayo.
Uthe ufuna iCaps United ilandele ezinyaweni zeqembu leMamelodi Sundowns yaseSouth Africa esanda kuthwala inkezo le.
UNgodzo odume ngelithi Josta enkundleni, ubikele uMthunywa ukuba angeke kwenze ukuthi iMakepekepe idliwe lula kumahlandla akuqala omncintiswano weChampions League obuthanisa intshantshu zenkezo kuzwekazi le-Africa.
Umdlali lo uthe ngokuqina abayikho, izimbamgodi zizaloba imbali ngokuba liqembu lakuqala eZimbabwe ukuletha inkezo yeCaf Confederations.
“ICaps United izayithatha inkezo yeCaf. Ngileqiniso lalokhu ngoba sizimisele. Ngakubika kudala ukuthi angisuki kulithimu ingakaphakamisi inkezo enkulu enjengeyeCastle Lager. Okwamanje angifuni kukhuluma okunengi, kodwa asimeleleni ukunqoba kwethu,” kutsho uNgodzo.
Kulisizini yeCastle Lager, umdlali lo utshibilike waba yinsika yethimu le eqede iyintshantshu yenkezo enkulu.
Uqhubeke wathi: “Ukuba seqenjini leli kuyangikhukhumeza. Liqembu elisenhliziyweni yami. Angeke ngiyendawo.
Khathesi inhlonso yami ikumidlalo yenkezo yeCaf Confederations. Akula okunye.”
Lomqeqetshi kaNgodzo uLlyod Chitembwe ukhulume ngokufanayo ukuthi iqembu lakhe selikhangelele ukudlala kuhle lamanye amathimu eAfrica.
“Abadlali bethu bonke abaphakamise iCaps United akumelanga sibalahle. Kulalabo asebekhulile ngeminyaka yokuzalwa kodwa babalulekile. Abadlali abasakhula bafunda okunengi kubo. Imidlalo yeCaf le izafuna ukuhlanganisa abadlali abalesikhathi kunguqu lalabo abalethalenta lekusasa egcweleyo.
“Ithuba lokuyancintisa eAfrica liyakhuthaza kakhulu. Umdlali munye ngamunye uyazi ukuthi lesi yiso isikhathi sokuziphakamisa,” kutsho uChitembwe.
UChitembwe uyachinsa ukuyaqeqetsha kunkezo yaphezulu eqoqwa yinhlanganiso yeConfederation of African Football.
Online Reporter