Online Reporter
Nkosilathi Sibanda
NGOMNYAKA ozayo iqembu lenguqu iHighlanders lizathakazelela iminyaka engu-100 lokhe lasungulwa njalo umgcinisihlalo walo uKenneth Mhlophe usecele ukuthi abasekeli babambisane leqembu kumalungiselelo omcimbi.
UMhlophe wethule lokhu ebonga ababukeli labasekeli abaqhubeka begcwalisa inkundla yeBarbourfields nxa iqembu lisekhaya kumidlalo yeCastle Lager Premier Soccer League.
“Njengoba sekusondela ukuthi sithakazelele iminyaka engu-100 ye-Highlanders FC, ngifuna ukuthatha leli ithuba ukubonga bonke abasekeli beqembu.
“Usekelo lwenu olungaguqukiyo lungumgogodla weqembu lethu esilithandayo njalo uthando lwenu luthuthukisa uhambo lweth
“Ngesikhathi sokulamaqembu alezikhwama ezigcwele imali ehuga abadlali, ukwethembeka kwenu siyakubona. Siyabonga ngokungasifulatheli, ngokugcwalisa i-Barbourfields Stadium maviki wonke, lokuhamba leqembu, ngitsho lasezikhathini ezinzima,” nguMhlophe lo ebika kuncwadi ayithumele kubalandeli beHighlanders kumakhasi enkundla zokuxhumana ebulenjini.
Uqhubeke wathi: “Njengoba silungiselela ukuthakazelela iminyaka elikhulu yembali yethu, siyakubona ukuthi iHighlanders iyilokhu eyikho lamuhla ngenxa yenu, abasekeli abazinikeleyo. Ukuziqhenya kwenu kuvusa umoya wabadlali bethu njalo uthando lwenu yilo olusenza sibe yilokhu esiyikhona.”
UMhlophe ubonge lamabhizimusi abasekelayo, wabuye wawanxusa ukuthi abe yingxenye yokuthakazelela iminyaka elikhulu.
“Kumankampani asisekelayo, siyalinxusa ukuthi liqhubeke ngokukholelwa kuHighlanders. Lingathikazi ukusebenza lathi. Ngokubambisana singabumba ikusasa lebhola emphakathini wethu. Abadlali labaqeqetshi bethu badinga usekelo lwenu. Asithakazeleleni iminyaka elikhulu, kube yisikhumbuzo esikhulu. Ngokubambisana sizahlonipha imbali yeqembu, siphendle ikusasa enhle.”
