derick.khumalo
Innocent Kurira
UMGCINISIHLALO weHighlanders uKenneth Mhlophe, usewalile amazwi kamaqhuzu weqembu, uDenzel Mnkandla, athi kasenelisi ukubuyela emsebenzini ngenxa yokungabhadalwa iholo.
UMhlophe uthe uMnkandla, njengomkhokheli weqembu kumele aqhubeke esebenza lanxa iqembu libhekane lobunzima bemali.
Encwadini ayibhalele uMnkandla, uMhlophe uthe kasamukeli isizatho sokungayi emsebenzini.
“Sengamukele incwadi yakho. Ngiyaxolisa ukukwazisa ukuthi kangemukeli isizatho osinikezileyo sokungabuyi emsebenzini,” kutsho uMhlophe.
UMhlophe ukhumbuze uMnkandla ukuthi njengomphathi omkhulu weHighlanders njalo elilunga le-Executive Committee, uyabazi ubunzima bemali iqembu elibhekane labo.
“Kumele ngikukhumbuze ukuthi njengomphathi omkhulu weqembu ulilunga le-Executive Committee, ngakho uyabazi ubunzima bemali iqembu elizama ukubunqoba khathesi.”
Uthe umsebenzi kaMnkandla ubalulekile ngoba nguye ophethe ukuphathwa kwansuku zonke kweqembu, ukusebenzisa izinqumo ezithathwa yikomithi lokuqondisa umsebenzi wehofisi.
“Njengo-CEO nguwe ophethe ukusebenza kwansuku zonke kweqembu, ukusebenzisa izinqumo ezithethweyo kanye lokukhokhela umsebenzi wehofisi. Yikho-ke ngingemukeli ukuthi ufuna ukuzikhupha kulumsebenzi oqakathekileyo ngesikhathi izisebenzi eziphansi kwakho ziqhubeka zisemsebenzini zidinga izixazululo zobunzima iqembu elibhekane labo,” kubhala uMhlophe.
Uphethe ngokukhuthaza uMnkandla ukuthi aguqule isinqumo sakhe abuye emsebenzini.
“Ngilindele ukuthi ucabangisise futhi ngesinqumo sakho ubuyele emsebenzini uqhubeke ugcwalisa izithembiso zakho ngaphandle kokuthi ngiphinde ngikukhumbuze,” kutsho uMhlophe.
Impendulo kaMhlophe ilandela incwadi kaMnkandla lapho atshele khona iqembu ukuthi kasenelisi ukuqhubeka esebenza ngoba uselenyanga ezintathu engaholi.
Online Reporter
Bongani Ndlovu