Siphakeme .Mnindwa
Ethel Ncube
KUSIGA esihlasimulisa umzimba kulendoda eleminyaka engu-29 yesigabeni seRatanyana, eKezi okubikwa ibisilenyanga ezimbili isiya emacansini lodadewabo oleminyaka engu-12.
Indoda le esingeke saqamba igama layo ngenhloso yokuvikela umamangala, ehlala ngaphansi kwenduna uNyangazonke kubikwa ibilala embhedeni munye lodadewabo futhi isimphatha njengonkosikazi wayo.
Indaba le ivele emthethwandaba weKezi ngoLwesihlanu ngeviki ephelileyo.
Umtshutshisi kulelicala uMnumzana Given Moyo ubikele inkundla ukuthi umsolwa wetheswa icala lokuhlukuluza umnawakhe emacansini.
Kubikwa mhlaka 24 Mpalakazi ngomnyaka ophelileyo umsolwa wathi umamangala ahlubule izigqoko andubana bahlangane emacansini ezivikele kodwa bengavumelananga lomnawakhe.
UMnu Moyo uchaze ukuthi njengoba inja ingaqhoba ithabo iyejayela umsolwa kusukela lapho ubevele eselala lomamangala embhedeni munye njalo esesiya laye emacansini santando loba wayezivikela.
Mhlaka 28 kunyanga ephelileyo, umsolwa wabuye wahlangana lomamangala kodwa ngenxa yokuba lokhu kwakungamphathi wasuka wayabhoboza ithumba leli ngokuyabikela esinye isihlobo.
Isihlobo lesi kasizange siphozise amaseko kodwa sahle sayabikela amapholisa esigaba wona enza icebo lokuthi ambambe.
Kubikwa amapholisa esigaba enelisa ukuthi ambambe amuse emapholiseni, umntwana wasesiwa esibhedlela.
Umantshi uBusani Sibanda ubike ukuba umsolwa uzabe evalelwe eGwanda uzaphenduka emthethwandaba mhlaka 13 kuyonale inyanga. Ubuye wamxwayisa ukuthi abhalele emthethwandaba omkhulu esenza isicelo sebheyili.
Online Reporter