Siphakeme .Mnindwa
Innocent Kurira
ABADLALI bebhola lenyawo bamaqembu akuligi ephakemeyo, iPremier Soccer League (PSL) sebeqalile ukulolonga, beqinisa imizimba belindele ukuqala kwesizini entsha.
Ngesikhathi amaqembu elungiselela, lenhlanganiso yePSL isikhiphe uluhlu lwemidlalo yonke yalisizini lokwenza umhlangano wamaqembu, oqhutshelwe koBulawayo ngempelaviki edluleyo.
IZimpapers Sports Hub ikhulume losaphethe isikhundla sikamaqhuzu wePremier Soccer League (PSL), uRodwell Thabe, uthe isizini entsha yomdlalo webhola lenyawo kungenzeka iqale mhlaka 1 Mbimbitho.
Amaqembu alitshumi lasikhombisa abuthane kulumhlangano. Iqembu lokucina okumele libe yingxenye yePSL alikabikwa ngokugcweleyo, loba kusaziwa ukuthi yiMWOS FC.
Kulumhlangano bekulokwabelana ulwazi lokwamukela amaqembu amatsha kuligi, phambi kokuthi kuvulwe isizini le ezadonsa inyanga eziyisitshiya galombili.
“Lolu luhlelo oluhle lwePSL lamaqembu angamalunga ayo. Kuyinkundla yethu yokuxhumana, futhi konke kuhambe kuhle. Sibe lesikhathi sokuxoxa ngenkinga zethu lezinto esizizuzileyo, siphinde sahlolisisa lesizini ka-2024, ngapho sihlela eka-2025,” kutsho uThabe.
UThabe ukhulume lokuthi kwaxoxiswana ngodaba losekelo lwemali lokufundisa amaqembu ngohlelo lweFifa Club Licensing.
“Sikhulume ngezihloko ezinengi okubalelwa kuzo ukuphathwa kwamaqembu, ukumaketha imidlalo kanye losekelo lwemali.
Siphinde saxoxa ngohlelo lweFifa Club Licensing. Ezinye indaba esikhulume ngazo zibalisela ukusetshenziswa kwezidakamizwa lokufundiswa kwabadlali.”
Mayelana ngesimo senkundla, uThabe utshele amaqembu ukuthi bezilungiswa kusukela ekupheleni kwesizini edluleyo.
“Sibonga uHulumende, amankampani azimele wodwa, abanikazi benkundla ngemizamo yabo yokuthuthukisa inkundla zabo. Ukunakekela inkundla lezi akulula. Siyazethemba ukuthi inkundla zethu zizabe sezilungele ukusetshenziswa mhla iligi iqalisa.
“Sengike ngakhulumisana lonobhala jikelele weZifa njalo ngilethemba lokuthi sizathola isiqinisekiso sokuthi sizakuba leqembu lesitshiya galolunye eduzane nje. Loba iqembu leli belingekho emhlanganweni, sihlele ukuthi sihlale lalo phansi nxa isibikiwe.
Siyayihlonipha indlela iZifa ephatha ngayo umsebenzi wayo njalo silethemba lokuthi izasibikela ngaleliqembu isizini ingakaqalisi,” kutsho uThabe.
Kusenjalo, iqembu elathatha isicoco seligi, iSimba Bhora, kanye leqembu leDynamos zizavula inkundla zesizini yalonyaka kumdlalo wenkezo yeCastle Challenge enkundleni yeRufaro, mhlaka 22 Nhlolanja.
Online Reporter