Online Reporter
Innocent Kurira
UMJAHO weZimbabwe School of Mines (ZSM) lonyaka uzaqhutshelwa enkundleni yeKhumalo Hockey Stadium, ngenhloso yokuwukhulisa, njengoba abaqoqi bawo befuna ukuthi usabalale.
Umncintiswano lo ukhangelelwe ukuthi uqhutshwe mhlaka 27 Ntulikazi. Kuminyaka edluleyo ubuqhutshwa enkundleni yeWhite City. Wasungulwa ngomnyaka ka2023, uyi-half marathon kodwa okwakhathesi usungumango oyi-42,2km. Ngomnyaka odluleyo, waqhutshwa kunanzwa ukufikisa iminyaka engu-94 yeZimbabwe School of Mines.
Lo, sekungumjaho obalelwa phezulu kukhalenda yeNational Athletics Association of Zimbabwe (Naaz) njalo uthola inengi labagijimayo asebebhalisa ukuphatheka kuwo minyaka yonke.
Umncintiswano walonyaka uhlelwe ukuba lamahlandla amabili, owe42,2km, 21km, 10km le-5km.
Abaqoqi bomncintiswano babike ukuba indleko yokuncintisa izakuba yi-US$15 kumango we-42,2km, 21km le10km. Labo abafuna ukugijima i5km bazabhadala i-US$10.
Inhlanganiso yeBulawayo Athletics Board (Bab) iyamukele ukuqhutshwa komncintiswano, yabika ukuba iyasuthiseka ngamalungiselelo.
Umgcinisihlalo weBab, uWatson Madanyika ubikele iZimpapers Sports Hub ukuthi bajabule kakhulu ukuthi umjaho weZSM Marathon usukhulise umdlalo njalo bakhuthaza ukuthi zonke ingcitshi zibhalise ukuzoncintisa.
“Sijabule kakhulu ukuthi umjaho weZimbabwe School of Mines Marathon usuphendukile njalo ukhulile kuminyaka emibili edluleyo. Siyethemba ukuthi ihlandla lalonyaka lizakwethulwa ngendlela ezasuthisa wonke umuntu,” kutsho uMadanyika.
“Inkundla yeKhumalo Hockey Stadium ifanele kakhulu ukuphatha umjaho lo ngoba iseduzane lasenzikini yedolobho lakoBulawayo. Silindele ukwamukela abagijimi abanengi abaphuma kuzo zonke izigaba zelizwe.”
Umphathi wekolitshi leZimbabwe School of Mines u-Edward Gwaze ubike ukuba umjaho wabo uyisitshengiselo sokusebenzelana lomphakathi.
Nyakenye lumjaho wanxusa abagijimi abavela kwamanye amazwe akhelane leZimbabwe kunye labanye abeKenya lase-Ethopia.
Kuhlandla labesifazane ku-42,2km kwanqoba uRosina Kiboino, etshaya intambo nge-2.52.13.
Wayeqalisa ukugijima kuleli. Kwalandela uPhillipa Dube, oweZimbabwe Republic Police owaqeda nge-2:54:48, kwathi u-Anne Chirisa wathola inombolo yesithathu nge-2:59:32.
Kwabesilisa kwanqoba uGamuchirai Tsveta oweReal Stars (2:19:25), elandelwa nguLyno Muchena (2:24:02) lo Israel Mudimba (2:24:22).
