admin
Johas Moyo
IZAKHAMIZI zakoSivalo, eNkayi zinathisana itiye ngokufa kwamadoda amathathu elandelana okukholwa ukuba athanyelwa yilunyoka lwelinye inina elalufakwa yitshamali yalo engusobhuku wakuleyondawo, uMthunywa uyakuveza lokhu lamhlanje.
Kucatshangelwa ukuba ulunyoka lolu lwabulala ngitsho lendoda yenina leli elinguEaster Khanye kodwa lisaziwa ngokuthi nguNkosikazi Magutshwa ohlala ngaphansi kwenduna uSikhobokhobo.
Kukholelwa ukuthi amadoda la omathathu ayethandana lenina leli afa ebulawa ngumkhuhlane munye okuyikho okwenza izakhamizi zicabangele ukuthi abulawa yilunyoka.
Usobhuku lo okhonjwa ngokubiya inina leli, uPhilip Ncube uvumile ukuthi uthandana lenina leli.
Kubikwa indoda yokucina eyabulawa yilunyoka lolu ife ngenyanga ephelileyo.
Esinye isakhamuzi esikhulume loMthunywa siveze ukuthi lanxa inina leli selilezidumbu ezintathu phansi lokhu liqhubekela phambili ngokuthandana lamadoda abantu.
“Silokudana njengezakhamizi ngoba abantu bafa sikhangele kodwa akukho lathi esingakwenza.
“Khathesi sizwela usizi omunye umkhokheli wesigaba othandana lomama lo ngoba laye elakho ukwehlelwa yilokhu okwehlela abanye,” kutsho uMnumzana Mthandazo Dube.
UMthunywa uxoxisane lomalume kaOwen Moyo, onguye owabhubha kunyanga ephelileyo okubikwa ubethandana loMagutshwa, uMnumzana Thulani Ngwenya yena obike ukuthi umzukulu wakhe wafa ngendlela ebuhlungu.
“Ngilokhe ngilesilonda esikhulu ngokufa komzukulu wami ngoba engagulanga okuyangaphi. Watshaywa likhanda okwesikhatshana nje wedlula.
“Esibhedlela bathi akula khanda elinjalo kungabe kuyinto yomuntu ngoba lifana xathu lelabulala omunye laye owayethandana loMagutshwa,” kutsho uMnu Ngwenya.
UMthunywa uxoxisane loNkosikazi kamuyi uMaNdlovu yena owehluleke ukukhuluma ngodaba lolu kodwa waphendula ngezinyembezi ethi udabukile njalo kakatholi ukubaxolela. Ekhuluma ngaloludaba uMagutshwa uvumile ukuthi kulamadoda amathathu ayethandana lawo abhubhayo.
“Kuliqiniso ukuthi sengilamadoda amathathu ebengilawo empilweni yami abhubhayo kodwa kangikwazi ukuthi abulawa yini yiloba besifa ngendlela efanayo.
“Indlela abafa ngayo bonke sisenza abantu esigabeni bathi ngilolunyoka lanxa mina ngingakwazi ukuthi babulawa yini ngoba umkami laye wafa ekhala ngekhanda lelo elifana lelikaMoyo,” kulandisa uMagutshwa.
“Into engimangalisayo yikuthi kungani bengafi ngalelolanga lapho engiqala khona ukulala labo kodwa kuthatha isikhathi kungakenzakali.
Ebuzwa ukuthi kuliqiniso yini ukuthi uthandana losobhuku uvumile.
“USobhuku uPhilip Ncube ngathandana laye kudala waze wangidingela umuzi phansi kowakhe lomkami esaphila kodwa kangisoze ngimkhulumele ngoba kangikwazi ukuthi wangifaka njani lolo lunyoka izakhamizi ezithi ngilalo njalo yilo engiqeda ngalo amadoda.
“Abantu kabasangikhulumisi lapho engihamba khona ngoba bethi ngingumbulali ngilezidumbu phansi, kubuhlungu kimi ngoba kangikwazi njalo loba kuyikho kangizenzanga,” kutsho uMagutshwa.
UMthunywa uxhumane lalo okucatshangelwa ukuba wafaka uMagutshwa ulunyoka uSobhuku Ncube ophike wemba phansi ukuthi wafaka umuntu ulunyoka ngoba laye esizwa abantu bexoxa ngakho etshwaleni.
“Ngilokhe ngilesithuli ngemihlola engiyizwayo lapha ngoba abantu bathi ngabulala amadoda amathathu ngolunyoka engalufaka uMagutshwa.
“Kangali ukuthi siyathandana njalo waswela omunye umntanami okuyikho okwake kwasixabanisa andubana athandane lomuyi uOwen.
“Kangazi lutho ngokolunyoka ngoba lami ngingalwazi kodwa ngezwa kuthiwa bonke abafayo bayabe bekhala ngokutshaywa likhanda, mina okwenza ngingafi kumbe yikuthi kangilawo lowo mkhuhlane obaqedayo,” kutsho uMnu Ncube.
UMthunywa udingisise kabanzi ngolunyoka lolu kuMnumzana Bekezela Dube oyisazi samasiko eLuveve Cultural Centre uthe ulunyoka lwehlukene.
“Kuliqiniso ukuthi kulolunyoka olubulala umuntu ngokumtshayisa ngekhanda njalo lolu luthiwa lilawu. Ulunyoka lolu kaluvamanga ngoba lufana lamaphoso. Inengi labantu bazi ulunyoka olukhukhumalisa isisu loluxakelisa abantu.
Nxa ufaka omunye ulunyoka kuba yisivumelwano,” kuchaza uMnu Dube.
Online Reporter