adminYiNtatheli kaMthunywa
UMAQHUZU weqembu leHwange FC uThomas Makore ubike ukuba ulesiqiniseko sokuthi iqembu lakhe lizavuka kuphela liligiqe lamaqembu azizwayo ukuze lalo lenelise ukulwela inkezo kusiyaphela isizini.
Kungxoxo abelayo loMthunywa ngoLwesibili uMakore uthe uyasuthiseka ngendlela abadlali abatshibilika ngayo okuyikho okumenza abelethemba lokuthi bazanqoba.
UMakore uthe loba uNation Dube owayengumqeqetshi wabo esemiswe umsebenzi okweminyaka emihlanu, lokho akutsho ukuthi ithimu le isiswele abaqeqetshi abangayilolonga. Kuzwakale ukuba iHwange ilakho ukuqhatsha uMabelo Njekwa ukuthi aphiwe umsebenzi kamqeqetshi ngokugcweleyo.
“Ngiyasuthiseka ngendlela esidlala ngayo. Sikhuthaza abadlali bethu ukuthi baphakamise iqembu leli ngoba yikho okufunwa yizakhamizi labalandeli bethu. Ngilokukholwa ukuthi iHwange izatshikilisana lamaqembu la okuthiwa yiwo ahluphayo kunguqu. Isiyaphela isizini sizabukela iHwange ezamangalisa abanengi ngokunqoba,” kutsho uMakore.
Phakathi kwamaqembu wonke akuligi yeCastle, iHwange yiyo yodwa eyenelisa ukugcina abadlali bayo bonke ababekhona ngesizini edluleyo. Inguquko eyabakhona kulithimu kwaba yikungena kwabadlali eqenjini elikhulu ngesikhathi samalungiselelo esizini entsha. IChipangano yakhetha ukuphakamisa abadlali abakumathimu ayo abasakhulayo.
Ebuzwa ngalokhu umgcinisihlalo wethimu uJoseph Zulu uthe: “Okwenza kwabalula ukuthi sibelabadlali laba yikuthi saxoxisana labo, sabazisa ngesinqumo sethu sokubagcina bendawonye. Siyakubongela ukuthi abadlali laba bakuzwisisa lokhu.”
Kuminyaka edluleyo kwakujwayelekile ukuthi iChipangano ibengeyokuqala ukuthenga abadlali abavela kwezinye indawo. Esinye isizatho sokuthi iHwange yehluleke ukuthenga abadlali yikuthi iqembu leli aliselamali ngoba inkampani yeHwange Colliery ehlawulela iqembu idonsa nzima.
UZulu ubike ukuba balombono ofana lokaMakore ngenxa yokuthi isinqumo esikhona ngeqembu yileso esivela kubasekeli lenkokheli ukuthi iChipangano idlalelwe ngabafana abaphuma eHwange kuphela.
“Ithimu iqine kakhulu ngoba isilungiswe yaphelela. Indlela iHwange ezaphenduka ibukhali ngayo, izethusa amaqembu akade eyidelela,” kutsho uZulu.
Kodwa, ngokuhlolisisa umdlalo walithimu kumasizini ambalwa adluleyo, kutholakale ukuthi iHwange yaqalisa kuhle, yehluleka isizini isiyaphutsha. Okwamanje ihlezi kunombolo yesitshiya galolunye kungalane yePSL iphethe imiklomelo elitshumi kuphela.
IHwange ijwayele ukungenzi kuhle emdlalweni ngesigaba sesibili somdlalo lapho esuka ilahlekelwe yimiklomelo loba iqalise itshisa.
Umaqhuzu weqembu uMakore, ucele usekelo lwabasekeli babo wathi sekumele balandele ithimu kumidlalo yayo yonke.
Online Reporter