Online Reporter
Bongani Ndlovu
USIZI lwehlele ezinye imuli zeMakhandeni koBulawayo ngemva kokuqhamuka komlilo otshise izindlu lempahla ngoMgqibelo ekuseni, okubangele ukuthi esinye isakhamuzi sikhethe ukuzibulala ngemva kwesehlakalo lesi.
Ilunga ledale leMakhandeni-Luveve, uDiscent Bajila, uthe uvakatshele imuli ezithintekileyo wathola ukuthi zilahlekelwe yikho konke ebezilakho ngemva kokutsha kwezindlu.
UBajila uthe kusolwa ukuthi umlilo waqalwa li-battery lefoni eladubuka eduzane letanka ye-gas.
“Lamuhla ekuseni ngivakatshele imuli zeMkhandeni ezilahlekelwe yikho konke emlilweni owaqhamuka ngoMgqibelo ekuseni. Kusolwa ukuthi li-battery lefoni laba lenkinga lapho okwakule gas tank khona,” kutsho uBajila.
Uthe loba kungazange kufe muntu ngesikhathi umlilo uqhamuka, kwatsha impahla yonke kungakafiki abacitshi bomlilo beBulawayo Fire Brigade.
“Abacitshi bomlilo beKhansili yakoBulawayo baphumelela ukusindisa enye ingxenye yesakhiwo, njalo siyababonga ngalokho,” nguBajila lo.
UBajila uthe sebeqalile ukuncedisa imuli ngokudla, kodwa kusadingakala olunye usizo olunengi.
“Okwamanje sibanike ukudla, kodwa kusadingakala olunye uncedo.”
Uphinde waveza ukuthi uMihla (22), obehlala kwenye yalezi izindlu lapho kusolwa ukuthi kwaqala khona umlilo, wedlule emhlabeni ngemva kokuzibulala.
Amapholisa lezinye iziphathamandla zeBulawayo Fire Brigade kazikethuli umbiko opheleleyo ngembangela yomlilo, njalo uphenyo luyaqhubeka.
