Online Reporter
Iqoqo: Umdumo wezinkondlo
Inkondlo: Hloniphani ubabhemi eyalotshwa ngu E. M Matshona
Ophezulu Stinta
Okumunyethweyo
Inkondlo le ikhuluma ngokuqakatheka kanye lokungaphathwa kuhle kwesifuyo esingubabhemi.Imbongi iyambabaza ubabhemi iqakathekisa elithi ubabhemi kahlonitshwe loba nje elenyama engadliwa muntu. Kumele lesi sifuyo sihlonitshwe kakhulu ngezenzo ezingcwele esaphatheka kuzo ebhayibhilini.
“Inkos uHerod ezingel’ uJesu
UJosefa wathatha wena babhemi
Abraham esiyanikela uIsaka,
Wathwali nkuni wena babhemi.”
Yilezi ke izenzo ezingcwele ezenziwa ngubabhemi endulo, ebhayibhilini elingcwele,imbongi ekhalela ukuthi zihlonitshwe. Yisifuyo esingcwele okwamagama sisibona lapho uJesu ehamba ngaso esiyangena eJerusalema isehlakalo esimangalisayo okwamagama, sibona langendlela abantu abatatazela ngayo besendlala amacansi lapho ubababhemi engena loJesu.
Laye ubabhemi lo uqobo lwakhe wadlula phezu kwalawo macansi sengathi laye yinkosi, kugcizelela ukuqakatheka kwakhe.
Phezu kobungcwele obungaka abantu basuka nje bangakutshayi ndiva ukuqakatheka kwalesisifuyo,kodwa okwenziwa ngabantu yikusuka nje bambhule ubabhemi lo,bamdlise olubabayo kungelasibongo.
“Uzul’ ukhangeleka engakunanzi
Ukubonga ngokukubhula samabele”
Phezu komsebenzi omangalisayo, omkhulu kangaka owenziwa ngubabhemi,akulasibongo asitholayo kodwa uyatshaywa loba kuyini umuntu afisa ukukukhuluma kumbe afisa kwenziwe ngubabhemi konke lokhu ukwenza ngelizwi lokumbhula kuphela.
Kacatshangelwa ukuthi angabe esizwa ubuhlungu hatshi,uyatshaywa kuphela.
Phezu kokuqakatheka ngobungcwele, ubabbhemi nxa edlula, kumbe ehamba kuzigaba ngezigaba akadingi ncwadi njengezinye izinyamazana kanye lezinye lezinye izifuyo ezidlula ngezidindo lezincwadi yena nje udlula kungela ncwadi etheni edingakala kuzigaba ezitshiyeneyo.
“Abezinyamazana bakuph’ imvumo
Yokuhamb indawo zonke ungelancwadi”
Ubabhemi lo laye seyisifuyo esingcwele mpela,sinanzelela lapho loba etshaywa njani yena uqhubeka ezithobile, loba etshaywa ebhulwa okwamabele vele kakhali, uthula nje sengathi akwenzakalanga lutho.
Uyabekezela kuphela asuke nje aqhubeke ngalokho okumele akwenze ethule zwi.Imbongi iyakhalaza ukuthi ubabhemi lo uyadingeka mpela ukuthi ahlonitshwe njengesifuyo esiphilayo esizwa ubuhlungu njalo.
Abantu bayekele ukuhlukumeza ubabhemi ngoba asikho lesi sodwa isici lesi okucaca senziwe ngubabhemi lo. Yisifuyo okudingeka sibongwe laso sihlonitshwe okwamagama.
