admin
Thokozile Mbedzi
KWEHLE iyezi elimnyama elokitshini leNkulumane koBulawayo ngoLwesibili emini lapho umntwana oleminyaka yokuzalwa eyisificaminwe mibili atshaywe khona ngamagetsi.
Umntwana lo igama lakhe ligodliwe, kubikwa ubezama ukukhwela phezulu kwe-drum ngapha ebambelele esigodweni esilentambo yamagetsi ngakibo aze ehlelwe ngamashwa la.
UMsekeli wesikhulumi samapholisa koBulawayo uAssistant Inspector Nomalanga Msebele uthe amapholisa eNkulumane achwayisisa ngesehlakalo lesi.
“Kulomntwana oleminyaka engu-8 oyinkazana otshaywe ngamagetsi ngesikhathi ezama ukuqansa phezulu kwe-drum ngapha ebambelele esigodweni sentambo yamagetsi ebisegumeni langakibo.
“Umntwana lo kubikwa utshaywe ngamagetsi eyedwa ngakibo okwenza omakhelwane batshayela uyise ucingo owamfica elokhu ethe daca phansi watshayela imota yezigulane ucingo,” kuchasisa uAsst Insp Msebele.
Kubikwa i-ambulensi yafika yamthwalela esibhedlela seMpilo lapho athi efika bathi usedlule emhlabeni.
Uphethe ngokucebisa uzulu ukuthi nxa kulentambo zamagetsi ezisegcekeni babikele abeZesa bazozilungisa.
“Njengamapholisa sithanda ukukhuthaza uzulu ukuba kabike zonke intambo zamagetsi ezingavikelekanga kulabo ababona ngomsebenzi lo ukuze singalahlekelwa yimpilo mahlayana nje,” kupthetha uAsst Insp Msebele.
Online Reporter