Online Reporter
Sikhumbuzo Moyo
UMONGAMELI uEmmerson Mnangagwa, usefikile koBulawayo lapho alande ukuzokhokhela umkhankaso wokuqoqa imali yokuthuthukisa isibhedlela seNgutsheni Central kunye lokusungula indawo yokuncedisa abasebenzisa izidakamizwa.
UMongameli wamukelwe egcekeni lendizamtshina eJoshua Mqabuko Nkomo International Airport nguMphathintambo weProvincial Affairs and Devolution koBulawayo uJudith Ncube, uMphathintambo wogatsha lweZimali lokuthuthukiswa koMnotho uSikhwicamfundo uMthuli Ncube, umgcinisihlalo weZanu-PF koBulawayo uJabulani Sibanda, lamalunga ePolitburo.
Umkhankaso lo ukhokhelwa yihofisi kaMsekeli kaMongameli uDokotela Kembo Mohadi njalo kulindeleke ukuthi kuqoqe imali efika i-US$5 million, ezasetshenziswa ekuguquleni isibhedlela esakhiwa ngomnyaka ka-1908.
Indawo yokwelapha labo abakhathazwa yizidakamizwa kukhangelelwe ukuthi ibe lenhloso enkulu yokulwa lodubo olukhulayo lokusetshenziswa kwezidakamizwa elizweni.
Eminye imisebenzi ezakwenziwa ifaka phakathi ukwakhiwa kwezindlu zangasese emizini yeCompound 39, ezemapulazini, ukulungiswa kwezindawo zokufuya inkukhu ezintathu, ukulungisiswa kwe-Eastern Farm lokwandiswa kwempompi zamanzi okuthelezela.
Kuzaphinda kwakhiwe ama-canal angamamitha angu-100 lokugejwa kwemithombo yamanzi. Izakhiwo zepulazi lesibhedlela lazo zizalungiswa, kuthi izindlu zezisebenzi ezimbili, iJ.W. Villa Ward lamakilinika kuthuthukiswe.
