Online Reporter
Kanengi nxa abazali belaya abantwababo kuvamile ukuzwa bethi ilizwi lomzali aliweli phansi njalo izibusiso zivela ebazalini, kusitsho ukuthi kuqakathekile ukuhlonipha lokulalela abazali lencwadi engcwele, iBhayibhili.
IBhayibhili lifundisa wonke umuntu ukuba kumele ahloniphe uyise lonyoko ukuze insuku zakho zande ezweni. Kodwa ngesinye isikhathi ngenxa yokungathembeki lokuswelakala kweqiniso okuvela ebazalini kusuka kuthelele abantwana umnyama, umntwana ayathe ubamba la athole indlela zinxibile lamanzi kawangeni.
Ngikhumbula omunye umngane wami uGovozile isintu sithi ezalelwe esibayeni ngeyakho, wayezelwe emveni kokuba uyise akhula esithi nguyise eke wadliwa zindunduma zasedolobheni okwesikhatshana, unina laye njengomuntu wenyama wehluleka ukuzithiba inkanuko lemizwa yemvelo walingeka sabamba isisu evele yena esezele lapha ekhaya.
Yindaba engazange ikhulunywe okuyangaphi, kodwa kusaziwa ukuba lumntwana wehlukene labanye. Wawuthi nxa umkhangele ebunzini kuhle kukhanye ukuthi ibumba liyatshiyana. Wafunda wasebenza waba ngumaqhuzu enkampanini ehola okumangalisayo, ehamba ngezimota ezitshintshanisa okwamasokisi, njalo abazali bakhe ebenzela konke abakufunayo.
Wayethi angakhomba lapha kuthi sekumele kufezeke izethembiso umuntu amane atshabalale okwamazolo esesaba insaba zelanga lebusika ngenyanga kaMpandula. Lokhu kwakhathaza umoya wakhe waya kubosiyazi lemasontweni omoya bonke bakhuluma into efananayo ngoba bona bebona okusemakhazeni okungabonwa ngelihlo lenyama kwathiwa kazalwa kulelo guma njalo lo athi nguyise akusuye kayebuza unina uzamtshela yikho engasoze athole umendo ngoba umoya wosendo uvalile ngci ngoba ebizwa ngesibongo esingayisiso.
Ngelinye ilanga wahlangana lomunye ubaba wamfanisa labakoyise uqobo kwahle kwamnika ithuba waqunga isibindi wafika wabuza unina, lakanye wamendlalela indaba wahluba indlubu ekhasini. Banengi abantu abazifica besesimeni sikaGovozile, kwesinye isikhathi umuntu ende kuhle kodwa kwale inzalo kuze kucine kudingisiswa ngoba emadokoteleni kuyabe kuthiwa akula nto embi kuze kulamule abomoya.
Abanye abantwana uthola esebenza kodwa kungakhanyi ukuthi wenzani, kubuhlungu ukuthi ukhule usithi umuntu nguyihlo ekucineni kuvele ukuthi kayisuye, ngoba lalapho nxa ulijaha nxa sekuthethelwa ngeke uziphathe intonga zomdeni funa ucunule idlozi ungasigazi linye labafowenu. Phela kuthiwa idlozi lingazonda yilo elivala umoya wosendo ukuthi ungazabe usabusisa lengane.
Ayixabene
