admin
YiNtatheli kaMthunywa
IZITABANE zesintwana okubikwa ukuthi zitshadile zisuke sezibaleka elokitshini ebezihlala kulo ngemva kokuba umphakathi uzihlasele wazitshela ukuthi zithuthe yonke imitshaqana yazo zinyamalale ngoba ngeke zihlale phakathi kwabantu ngenxa yehlazo lazo lokutshadana.
UNonkululeko loNokuthula Mthembu bonke abaleminyaka engu-30 yokuzalwa abaphakathi kobudlelwano lobu obutshaqisa imizimba yabanengi bathe bazalwisa ukuthi baqhubeke behlala elokitshini labo ngoba kulilungelo labo njalo bengabantu abafana laye wonke umuntu ophila emphakathini.
Laba ababili badabuka KwaNgcolosi eThekwini, eSouth Africa.
“Kulilungelo lethu ukuthi sihlale lapho esifuna khona kungakho-ke sizayisa enkantolo indaba le ngoba isizwisa ubuhlungu impela.
“Akulunganga ukuthi abantu babe lobandlululo olungaka ngoba asizenzanga sazalwa sinje, kungakho-ke sifuna ukuhlala lapho ebesihlala khona kungekho osiphazamisayo, osixotshayo kumbe osibandlululayo,” nguNonkululeko lo.
Kubikwa izakhamizi zabakhipha ngodlakela lapho abahlala khona ngemva kokuba induna yalindawo isizwe ukuthi bayizitabane ezitshadileyo.
“Sasilobudlelwano obuhle lenduna yakule indawo andubana abantu bayibikele ukuthi silobudlelwano obungafunwa ngabantu bakulindawo.
Ngemva kwalokhu indaba le yahle yaba munyu ngoba induna labomdeni wayo babesiza emzini wethu basithethise bethi siphambanisa njalo singcolisa ibizo lesiqinti elihle. Induna yathi yayicabanga ukuthi siyizelamani yikho yasinika indawo yokuhlala,” nguNonkululeko lo.
“UNdlela wathembisa ukuthi uzathuma abantu bazodiliza umuzi wethu.
“Phezu kwalokhu waqala ukusethesa icala lokuthengisa izidakamizwa yikho nje saya emapholiseni sayathatha i-protection order ukuze angaphazamisi kumbe ukufinyelela impilo zethu. Amapholisa ehluleka ukuvula idokhethi ngalelicala lenduna uNdlela kodwa asixwayisa ukuthi siyemangala emthethwandaba.”
UNokuthula uthe: “Sabaleka endaweni esasihlala kuyo ngoba abantu abawamukelanga umtshado wethu.”
Ebuzwa ngalindaba uNdlela uthe akazimiselanga ukuthi ethule imicabango yakhe ngendaba le.
“Ngizathi ukuhlangana lobanye abakhokheli besigaba ukuze siyicubungule lindaba.”
Isikhulumi samapholisa eKwaZulu Natal uLieutenant-Colonel Thulani Zwane uthe: “Nxa kuyikuthi bazizwa behlukulezekile kumele kuvulwe icala ngalindaba.”
USibongiseni Khumalo oyisikhulumi sezitabane zeThekwini uthe: “Abantu bahlutshwa yikungazi yikho okwenza baphathe abanye abantu sengathi ayisibo bantu. “Sikhangelele ukuthi sihlangane lenduna ukuze sizwe ukuthi yona ithini ngodaba lolo.” — Ubulembu
Online Reporter