Online Reporter
YiNtatheli kaMthunywa
UMPHATHINTAMBO obona ngokwenzakala esabelweni sakoBulawayo, uKhomuredi Judith Ncube uncome izakhamizi zedolobheni leli ngokukhetha ukuthula loba bekulemlayezo ebigcwele kunkundla zokuxhumana ebinxusa uzulu ukuthi atshengisele elizweni lonke jikelele.
UMphathintambo uNcube uncome ukulandelwa komthetho ngesikhathi ekhuluma lentatheli eMhlahlandlela Government Complex ngoMvulo.
“Sibe lomhlangano wethu lamalunga eJoint Operations Command (JOC) sizama ukuhlolisisa umumo. Kuyangithokozisa ukulibikela njengezakhamizi zakoBulawayo ukuthi isabelo sethu silokuthula,” kutsho uMphathintambo uNcube.
Uthe loba ezinye izikolo zivaliwe, mhlawumbe ngenxa yokwesaba okungaziwayo, isimo sithule.
“Lanxa izikolo zethu zivaliwe mhlawumbe ngenxa yokwesaba. Kasikatholi ulwazi kumqondisi wethu wezemfundo, kodwa uma kungenjalo, kuze kube khathesi kulokuthula emphakathini,” kutsho uMphathintambo uNcube.
UMphathintambo uNcube uncome izakhamizi ukuthi koBulawayo akuzange kube khona ukuphazamiseka.
“Sithanda ukwazisa izakhamizi zakoBulawayo kunye lokwazisa ilizwe lonke ukuthi uBulawayo ukhethe ukuthula.”
