Online Reporter
Nkosilathi Sibanda
INHLANGANISO yeLakers Basketball Foundation izaphatha imidlalo ye-basketball kulinyanga, lapho amaqembu amakhulu azadibana khona kulumqhudelwano oqhubeka ngokukhula minyaka yonke.
Umncintiswano ozaqhutshwa mhlaka 21 – 23 Lwezi, enkundleni yeKhanyisile.
Kusukela ngo-2010, umqhudelwano lo, usuhlanganise amaqembu akoNtuthu lalawo avela kwezinye indawo kuleli kunye lakwamanye amazwe angomakhelwane. Injongo emqoka kuyikukhulisa umdlalo, ukubambanisa abadlali lamaqembu lokuphakamisa umphakathi lethalenta elisakhulayo.
Lonyaka indikimba yomncintiswano igxile kumkhankaso wokukhuthaza abantu ngokuqakatheka kokuziphatha kuhle, impilakahle yengqondo lokuqina kwamaqembu.
Unobhala weLakers Basketball Foundation uPorcia Dube ubike ukuba umqhudelwano wabo ukhula minyaka yonke njalo uyinsika ekusebenziseni ezemidlalo ekukhuthazeni umphakathi ngezempilakahle. “I-Lakers Tournament akuwona umncintiswano womdlalo kuphela kodwa, umayelana lokuxhumana phakathi kwabadlali lamaqembu. Ngumncintiswano ohlanganisa ndawonye abadlali abavela emadolobheni ehlukeneyo ukuze babelane ulwazi, bakhe ubudlelwano,” kutsho uDube.
Lonyaka ukusebenza kweLakers Basketball Foundation ekuphakamiseni i-basketball elizweni kubonakele ngokusekela umncintiswano wama-Under 16. Mhlaka 18 Mfumfu, iqhube imidlalo yama-Under 16 lapho ebisebenza lenkampani yeLobels Bread, Chaemike Branding and Signage lesikolo se-Eveline High School.
Kumdlalo wabesilisa, intshantshu ka2024 yomqhudelwano omkhulu weLakers Basketball Foundation kwaba liqembu leGiants. Ngo-2023, kwanqoba iBasketball Hounds. Amanye amaqembu aseke athwala linkezo yi Young Stars Academy (2022), leLakers Talen Vision (2021).
Kuhlandla labesifazane, kusukela ngo2021 lokhe kunqoba iqembu elilodwa, iLakers Mzansi.
