admin
Kearabiloe Nare
KULENINA elibanjwe xhaka ligebha egumeni labantu libhunyumunyu elokitshini lePumula Old koBulawayo ngempelaviki edluleyo andubana licatshe ngomunwe lithi lizothatha izinto zalo.
Inina leli okutholakale ukuthi nguMaDube nje kuphela litholakale emzini kaNkosazana Ncube kuJ31 kusempondozankomo.
UMthunywa uzwe ukuthi inina leli lasuka livela kwenye isonto yeZiyoni lapho elasuka selingathi kalisaphilanga kuhle engqondweni lisiyagebha emzini kaNcube.
Omunye umfakazi okhulume loMthunywa uMnumzana Fanuel Ndlovu uveze ukuthi kukhanya uMaDube ezogebha phakathi kweguma likaNkszn Ncube wayesuka esontweni.
“UMaDube wasuka ephaphatheka esontweni yeZiyoni lapho akhitshwa khona idimoni wasala sengathi kasaphilanga kuhle engqondweni waqonda endlini kaMaNcube waqala ukugebha phakathi eyadini ethi ufuna ukuthatha izinto zakhe,” kutsho uMnu Ndlovu.
Kuzwakale njalo ukuthi uMaDube wayengumninindlu le afika wagebha kuyo.
“UMaDube kukhanya kukhona akubikelwa esontweni yakhe sibili okuyikho okwamenza wazowela endlini le atholalakala esegebha khona,”
UmntakaNkosazana Ncube owale ukuqanjwa ngebizo ulandisele iphephandaba likazulu esithi “indlu abahlala kuyo bayithenga komunye umama eminyakeni edlulileyo ngakho bamangala bevuka ekuseni bethola uMaDube egebha eyadini ethi uzothatha izinto zakhe kodwa isimanga yikuthi kazange afike asazise ngokuthatha impahla zakhe njengomuntu owayesengena emzini wabantu njalo okunye okwasethusayo yikuthi wabuya eqephuzela nje eze,” kutsho umfana lo.
Izakhamizi ezasezibuthene koNkszn Ncube kukhanya zaphanga zabikela amapholisa ePumula ahle abuya azothatha uMaDube engakakhiphi lempahla ayezilandile.
Isikhulumi samapholisa akoBulawayo uInspector Precious Simango uvumile ukuthi bamukele umbiko wenina elatholakala ligebha egumeni labantu ePumula Old.
“Samukele umbiko wenina elitholakale ligebha egumeni labantu ePumula Old ngempelaviki njalo sisachwayisisa ngawo,” kuphetha uInsp Simango.
Online Reporter