Online Reporter
Bhekimpilo Tshalibe
KULAMADODA amabili avela eSilobela akhululwe emthethwandaba omkhulu weGweru ecaleni abaletheswayo olokubulala uQalisani Tshuma oleminyaka engu 31 ovela eLower Gweru.
Kubikwa mhlaka 13 Mpandula 2024 ngo2020hrs uMuyi uQalisani Tshuma lomgane wakhe uThabo Sibanda babehamba ngemota emhlophe yohlobo lweIveco eyayitshayelwa nguDennis Mdlongwa. Kuzwakale ukuthi uMayibongwe Maphosa (24) loRomeo Sezydekurira (31) labo babephakathi kwaleyo mota njalo bathe befika emzini kalo osengumuyi kwaba lokungezwani phakathi kukaMayibongwe lalo ongasekho okwabangela ukuthi bacine besilwa.
Inkundla ibizwe ukuthi ngesikhathi kuvuka umsindo uRomeo watshaya umuyi ngefotsholo ekhanda okwamenza wawela phansi. Kuzwakale ukuthi umuyi uthe evuka uMayibongwe wamgwaza ngengqamu eqolo njalo abasolwa bobabili babaleka. Ngemva kwesikhatshana osengumuyi wabhubha kubangelwa yikugwazwa akwenziwayo.
Ngesikhathi kuthoniswa icala kubelobufakazi obuveza ukuthi osengumuyi nguye owaqalisa ukuhlasela. Kuzwakale ukuthi abafakazi bafakaze ukuthi osengumuyi wakhipha ingqamu wahlasela uMayibongwe owabalenxeba emlenzeni lelinye esandleni. INkundla iphethe ngokuthi uMayibongwe wayezivikela njalo iphinde yathola lokuthi uRomeo kazange atshaye osengumuyi ngesikhathi kuxatshanwa.-Indaba le ithethwe kukhasi leNational Prosecuting Authority of Zimbabwe kuX.
