Online Reporter
Ethel Ncube
INDUNA uDobola yeBinga isiveze ukuba izabhoda ezigabeni zayo ifundisa abantu ngobungozi bokusondela emanzini kanye langendlela zokuhlala bephephile ngesikhathi sezulu.
UDobola ubike ukuba lokhe kwaqala ukuna izulu akukabi lengozi ephathelane lezulu ebikiweyo endaweni yakhe.
Ekhuluma lentatheli ubike ukuba uzaqala ukubhoda ezikolo ehamba ngaloluhlelo lwakhe.
“Ngizaqala ezikolo ngibhoda ngisazisa ababalisi ukuba bengabona izulu lithwala bagcine abantwana ezikolo izulu line liphele, bengahambi izulu lisina. Ngizama ukuthi sizame ukwenqabela ingozi yokuthi abantwana bathathwe ngamanzi sebethole umfula ugcwele bafika bazama ukuchapha. Abantwana labo bazafundiswa ukuba bengathola imifula igcwele bengaqali ukungena emanzini kodwa babuyele emuva baye emizini eseduze kumbe ukubuyela esikolo,” kubika induna uDobola.
Uqhubekele phambili ebika ukuba uzazama ngamandla wonke ukufikisa uhlelo lwakhe lolu endaweni zonke ezingaphansi kwakhe.
“Ngizabiza osobhuku bami abezigabeni zami zonke ngibatshele ukuba labo batshumayele ngengozi yamanzi kuye wonke umuntu kugoqela abantwana labadala. Osobhuku bazabiza izakhamizi bazifundise lami ngizabhoda kwezinye indawo. Sizabhala lamabhakane sifake endaweni lapho okukhiwa khona amanzi abantu bazibalele ukuba bengaqali ukufaka impilo zabo engozini. Abantwana abachapha imifula kuyamele baphelekezelwe baphinde balandwe. Abazali kuyamele baphane amazopho okuphelekezela abantwana. Abathanda ukuwatshela emifuleni labo kumele bafundiswe ukuthi bananzelele banganeni emfuleni ulamanzi amanengi ngoba ayenelisa ukubathatha,” kuphetha uDobola.
