Online Reporter
Ethel Ncube
KULENDODA yeMbizo, eKwekwe ehlahlele isithandwa sayo saze safa ngoba inakanela ukuthi siyajola ngeviki ephelileyo.
UAnna Matambo oleminyaka engu-32 yokuzalwa ubulewe lijaha lakhe akade sebelomnyaka bethandana.
Kubikwe ukuba uPaul Mlambo wavakatshela intombi yakhe lapho ehlala khona wathola abantwabayo bebodwa yona iphumile. Wasuka wayacatsha kwenye indlu eseduzane engaphelanga ukwakhiwa emlindele ukuba aphenduke. Uthe ephenduka uMlambo wamlanda wambuza ukuba uvela ngaphi okwabangela ukuthi kucine sokungakhulunyiswana kuhle ngoba uMlambo esethesa uAnna icala lokuba uvela emjolweni. UPaul wabuyela lapho akade ecatshe khona wabuya esethwele ihloka okwenza u-Anna wabaleka labantwana. UMsolwa wamgijimisa wambamba wamhlahlela kathathu ngehloka wahle wedlula emhlabeni. Umetheswacala wahle wacela ezinyaweni wabaleka kaziwa lapho akhona.
Kusenjalo kulendoda yeKwekwe ebizingela yagalula emfuleni isekela ibhalabhala mhlaka 14 Nhlolanja ebusuku. USeverino Kufahanduyi oleminyaka engu-25 yokuzalwa wayehambe ukuyazingela wavusa ibhalabhala walisekela labaleka layachapha umfula ugcwele, laye wangena emanzini elilandela. Ngokuswelakala kwenhlanhla wathathwa ngamanzi. Amapholisa ahamba ayathwala isidumbu somuyi basithwalela esibhedlela seKwekwe lapho okuzahlolwa khona imbangela yokufa.
Intatheli ixhumane lesikhulumi samapholisa eMidlands uInspector Emanuel Mahoko obike ukuba ingozi lezi zombili zenzakala,
“Sicela ukuba uzulu angaba lohlupho alungisise ngokuthula hatshi ukulwa. Sicela ongabe elolwazi ngoPaul Mlambo ukuba ungaphi azise amapholisa aseduzane laye. Sibuye sixwayise uzulu ukuba angaqali ukuzama ukuchapha umfula nxa ugcwele loba sujahe okunganani ungaqali ukungena emfuleni olamanzi amanengi,” kuphetha uInsp Mahoko.
