Online Reporter
Mthokozisi Ncube
KULENDODA yesabelweni seMatabeleland South ethi umtshado wayo wachitheka ngesizatho sokuba umkayo wayethandana lomalumakhe.
Kundaba le esemlonyeni yabantu, uMelusi Ndlovu uthi umtshado wakhe loRebecca Mayiza wachitheka ngemva kokunanzelela ukuthi wayethandana lomalumakhe uBenard Mayisa.
URebecca wale wemba phansi insolo lezi, wathi ngamanga aluhlaza tshoko akhulunywa ngowayengumkakhe ngoba efuna ukumkhawulisa njengoba umtshado wabo wachitheka.
Imizamo yokukhulumisana loBenard Mayisa yehlule. Intatheli yenze imizamo yokukhuluma laye ecingweni kunye lakuWhatsApp kodwa impendulo ibingakatholakali kwaze kwafika isikhathi sokudindwa kwephephandaba.
Ekhuluma lentatheli, uMelusi uthe yena loRebecca babethethene ngomtshado wesintu njalo basebeqale impilo yabo umtshado wabo ungakachitheki.
“Ngangimthemba uBenard futhi ngimbona njengobaba. Wasinika isitanda duzane lomuzi wakhe ngasibiya njalo ngathenga lempahla yokwakha,” kutsho uMelusi.
Kubikwa umtshado wababili laba waba phakathi kobunzima ngesikhathi uMelusi esebenza phandle kwelizwe.
“Ngangisebenza eBotswana, ngemva kwesikhathi uRebecca wangitshela ukuthi kasenelisi ukuthi siqhubeke sindawonye,” kutsho yena.
Uthe ekuqaleni kazange akukholwe ayekutshelwa yizakhamizi ukuthi uBenard nguye owabangela ukwehlukana kwabo.
“Abantu babengitshela ukuthi umalume nguye owabangela ukuthi umuzi wethu uchitheke, kodwa ngangingakukholwa lokho, ngoba ngisithi yindoda elungileyo.”
Uthe laye wacina esiba lensolo esenanzelela indlela uRebecca ayeseduze ngayo lomalumakhe.
“Konke umkami ayekwenza umalumakhe wayesiba khona. Wayehlala esemzini wakhe njalo wacina esezithwele. Insuku kodwa azizange zifanane lalapho engangikhona ekhaya,” kutsho indoda le.
Uqhubekele phambili esithi omakhelwane kunye labanye abasebenza loRebecca bamtshela ukuthi wayehlala emphelekezela njalo ezomtshiya emsebenzini.
Indoda le eyaliwayo ibuye yaveza ukuthi wathi ebuza ababili laba waliswa ukubona umntwana.
“Indaba le ngayibikela lomkamalume kodwa laye wathi akulanto enjalo,” kutsho yena.
Ubuye wathi umalume lo wamethusela ngokuchaza indaba le.
“Wathembisa ukungibulala kunye lomunye ozakhuluma lentatheli,” kutsho uMelusi.
URebecca wale wemba phansi indaba le wathi uMelusi uhlose ukungcolisa isithunzi sakhe kulandela ukwehlukana kwabo.
“Ngiyabonga ngokungipha ithuba lokuphendula loba indaba le ingamanga,” kutsho yena.
Uthe ubudlelwano babo baphambaniseka ngenxa kokungathembeki kukaMelusi.
“Konke kwakuhamba kuhle waze waqala ukungathembeki kimi. Sonke isikhathi ngangisithi ngingamkhanda axolise athembise ukuthi uzatshintsha kodwa aqhubeke.”
Uthe waquma ubudlelwano babo ngomnyaka ka-2023 ngemva kokunanzelela ukuthi uMelusi uthandana lesinye isisebenzi sabo.
“Ngafulathela ngimfice eseqotsheni lowayengincendisa endlini owayekhangela abantwabethu,” kutsho yena.
Uthe uRebecca uthe uMelusi waqhubeka ethandana labanye abesifazana eseBotswana.
Ubuye wathumela ama-screenshots emlayezo eyayithunyelwa nguMelusi, lezithombe elomunye owesifazana.
Ubuye walandula ukuthi uMelusi nguye owayekhipha imali yokwakha iphurojekithi abalayo lapho okwakungumuzi wabo khona.
“Lami ngangikhipha imali yokwakha. Ngangigcina imali yami ngamakilabhu ngibhadala abakhi. Ngasala ngingela lutho,” kutsho uRebecca.
URebecca uthe umuzi lowo ngowabazali bakhe njalo wanikwa yena kungelambadalo.
“Wazonda esetshelwa ukuthi ngeke awuthengise ngoba ungazange uthengwe. Kwakungumhlabathi wangekhaya engawunikwayo.”
Ubuye walandula insolo zokuba uthandana lomalumakhe.
“Angikwazi lokhu akhuluma ngakho. Uzama ukungingcolisa nje abesevala ububi bakhe.”
Uthe uMelusi uhlala emethusela kusukela ngesikhathi besehlukana njalo wake wazama ukuthi babuyisane.
“Wayefuna ukuthi sibuyisane kodwa mina ngala. Akuzamayo nje yikuthi angihlambalaze isithunzi sami.
Insolo lezi sezisabalaliswe kunkundla zokuxhumana, lapho uMelusi aphose kunkundla ezehlukeneyo kuFacebook, osekubangele ukungunguna esigabeni.
