Online Reporter
Raymond Jaravaza
KULABANTU abalimeleyo kulandela isehlakalo lapho omunye umtshova abakade bewugadile uphambuke emgwaqweni watshayelela emdulwini wenye indlu eCowdray Park, koBulawayo ngoLwesithathu emini.
Kubikwa umtshova lo, ongaphansi kwenhlanganiso yeTshova Mubaiwa, uphinde wabhidliza ingxenye yesilugu senkukhu esiphakathi kweguma.
Abezimo eziphuthumayo bafike masinyane endaweni okwenzakale ingozi le.
Kuthunyelwe ama-ambulance amathathu kanye lamaloli amabili eBulawayo Fire Brigade ukuzosiza abalimeleyo kanye lokuhlenga isimo.
Ngesikhathi intatheli zeZimpapers zifika, abacitsha umlilo abakuBulawayo Fire Brigade bebesusa imfucuza esilugwini esibhidliziweyo bezama ukukhipha inkukhu ebezivalelwe phakathi.
Abalimeleyo, okubalelwa lomtshayeli womtshova, bahanjiswe esibhedlela ukuze bathole uncedo.
Umnikazi wendlu, uNkosikazi Sibonele Nkomo, uthe uzwe umsindo omkhulu, wabona umtshova usungene egumeni lakhe.
“Bengihlezi endlini ngisizwa umsindo omkhulu, ngithe ngiphuma ngibone umtshova usungene egumeni lami. Ezinye inkukhu zivalelwe phakathi kwesilugu, ezinye sezifile,” kutsho uNkksz Nkomo.
UChief Fire Officer kuBulawayo Fire Brigade uMnumzana Mhlangano Moyo ubengakaphawuli ngalingozi ngesikhathi sokudindwa kwephephandaba.
