admin
Nkosilathi Sibanda
USETSHIYE isikhundla obengunobhala weHighlanders u-Israel Moyo ngoba esithi ulandela okuphawulwe yisisekelo sombuso.
UMoyo ubike ukuthi wenze lokhu ngoba engumuntu olandela umthetho weqembu kulandela ukumiswa lokwedluliswa phambili kokhetho lwenkokheli zeHighlanders, obekumele luqhutshwe mhlaka 7 kuNhlolanja.
Amalunga eHighlanders bekukhangelelwe ukuthi avotele umgcinisihlalo, unobhala lelunga lekomithi.
Izazi kwezokucubungulwa komthetho wezokukhokhelwa kwesisekelo sombuso zitshele uMthunywa ngoLwesibili ukuthi kuyimfanelo njalo kulindelwe ukuthi bonke ababambe izikhundla ezintathu lezi batshiye izihlalo.
Okwamanje uKenneth Mhlophe nguye umgcinisihlalo njalo ufuna ukuphendukiswa esikhundleni. Ilunga lekomithi elisakhona, uWisdom Mabhena kasoke afune ukubuyiselwa ngoba umthetho awuvumi.
Ukutshiya kukaMoyo isikhundla sekudale ukungezwani kunkokheli zeBosso nanko kulabanye abathi uMhlophe sekumele atshiye laye.
Ngeviki edluleyo, umgcisinihlalo webhodi yeHighlanders uLuke Mnkandla ubike ukuthi ibhodi ithethe inyathelo lokuthi uMhlophe aqhubeke ekhokhela kuze kufike mhla wokhetho.
UMoyo uthe ukuba khona kwakhe kubukhokheli beqembu yikwephula isisekelo sombuso.
“Ngeke ngiphikisane lomthetho,” kutsho uMoyo ngoLwesithathu ebika ngokutshiya kwakhe.
Online Reporter