admin
YiNtatheli kaMthunywa
NGENXA yokomela isikhundla sokuba nguMongameli welizwe, owayengumsekeli kaMongameli wakuleli uDokotela Joice Mujuru waze wafika kuzinga lokuqhatsha inyanga zeNigeria ukuze zimncedise kumizamo yakhe yokugenqula uMongameli Mugabe ngokungekho emthethweni ngokumthakatha.
Inkemenkeme le ivezwe nguMongameli Mugabe ngesikhathi ekhuluma labantu abakade bethe gwaqa ehoteleni ye-Elephant Hills eFolosi kuthakazelelwa ukwenelisa kwakhe iminyaka engu-91 ngoMgqibelo odluleyo.
Okutshisa amathe ngalesisiga yikuthi imithanithani le yayisenziwa uDkt Mujuru ezigqokele isudu yokuzalwa.
“Lokho kwakusenziwa elaywe ukuthi akhuphe izigqoko. Amabele asale phandle. Ezinye zezinto esizenziswa zinyanga bakithi! Kambe umama esalwa laye impi?”
UMongameli uqhubekele phambili wathi eminye yalimithanithani eyayijonge ukumbulala kanye lomkakhe uDokotela Grace Mugabe yenzelwa epulazini likaMujuru eBeatrice.
“Lapho ke kwabulawa izimvu ezinhlanu. Angazi ukuthi uMugabe obeseqale wabulawa eyinkukhu ubesevuke waba yimvu nini futhi? Enye imvu yayimela mina, enye imela unkosikazi wami. Lapha ke angazi ukuthi uMnangagwa wayesethiweni kodwa zabanhlanu izimvu ezabulawelwa khonale epulazini zatshiswe. Inkukhu zonke ezabulawayo kwathiwa zingadliwa. Sasisethuselwa kuthiwa lizabona.
“Ngazitbuza ukuthi amaNigerian lawo awathatha ngaphi amandla okufaka umphefumulo womuntu enkukhwini kumbe emvini bambulale? UNkulunkulu ngowethu sonke. Lami ngiyasonta angikholelwa ebuthakathini. Safundiswa izifundo zikaNkulunkulu.”
UMongameli uqhubekele phambili wathi owaxotshwa esikhundleni sokuba ngumphathintambo wogatsha lwePresidential Affairs uDidymus Mutasa laye wayeyinsika kumizamo yokumgenqula ngokungekho emthethweni.
Uthe abantu akumelanga bakhalele izikhundla njengoba yena engazange aziphuphe enguMongameli kodwa wakhethwa ngabanye ukuthi akhokhele..
“Ngangisebenza labanye bami. Angizange ngathi ngizakuba nguMongameli ngangizenzela umsebenzi engangiwuphiwe. Akulalanga elilodwa engake ngakhonona khona ngomsebenzi kumbe ukulangathelela umsebenzi owawungaphezu kwami. Ngitsho! Ngangizitshela ukuthi lowo msebenzi engangiwuphiwe wawunganele ekuthuthukiseni ibandla lempi yethu.
“Abanye bakubona ukuthi ngingenelisa ukukhokhela. Ngabamukela lobo bukhokheli njalo sengisebenze ngendlela emqoka kakhulu engela kuzikhukhumeza ukuthi yimi ngedwa engenelisa ukwenza izinto.
“Engingavumelani lakho yikusebenza ngaphandle kwezinqumo,” kuphetha uMongameli.
Online Reporter