admin
Lucky Tshabalala
ZINKONDO zodwa eWest Junction eMguza ngenxa kasobhuku wakulesosiqinti okubikwa ehlalisa abantu ngokungekho emthethweni kuleyondawo, uMthunywa ukuzwile lokhu.
Kubikwa izakhamizi zeMantankeni zamukela umbiko wokuthi kuzaba lomhlangano wokuhlalisa abantu abathize kuleyondawo kuviki edluleyo.
Umfakazi oqotho okukhomithi yezakhamizi ebona ngokuhlaliswa kwabantu owale ukuqanjwa ngebizo ubikele iphephandaba likazulu ukuba okumangalisayo yikuthi lababantu bebezohlaliswa kulindawo kungalandelwanga indlela eyiyo yokubhalela emahofisini.
“Usobhuku wabuya labantu bakhe lapha esithi bafuna ukuhlaliswa kutsha kodwa okwasimangalisayo yikuthi kasizange sibhalele emahofisini ezomhlabathi sibacelela ukuthi bahlaliswe kulindawo,” kutsho ilunga lekhomithi leli.
Lumfakazi ubuye waqhubeka wathi impi le yabuya yakhwezelwa yikuthi umlisa laye wayekusekela lokhu esithi uvela lalabobantu emahofisini abona ngokwabiwa komhlabathi.
Uqhubekele phambili waveza ukuthi kulandela lesisiga kube lomhlangano ngoLwesibili lapho izakhamizi ezifunge zagomela ukuthi abantu labo angeke bahlala labo.
UMthunywa uxhumane losobhuku wakulowomango uMnumzana Thamsanqa Makhosana kodwa walile ukuthi kuke kwaba lesiga lesi.
“Mina angikwazi lokho, akulanto enjengaleyo eke yenzakala lapha endaweni yaseWest Junction” kutsho uMnu Makhosana.
Ayisikho kokuqala lokhu ukubona abakhokheli besebenzisa amandla ngendlela engayisiyo, kuke kwaba njalo komunye usobhuku wesinye isigaba seMberengwa okewafuna ukuthi azithathele umvundiso wezakhamizi zakuleyo ndawo.
Online Reporter