Online Reporter
Innocent Kurira
UMFANA odlala e-Arsenal F C, Teshaun Tarumbidzwa Murisa (17), owazalelwa eNgilandi, usayine inkontileka yakhe yokuqala kuleliqembu, kodwa umbuzo okhona kubalandeli benguqu kuleli ngowokuthi uzawadlalela na amaWarriors?
Abazali balumdlali ngabeZimbabwe.
UMurisa uqale ukudlala ngaphansi kwe-Arsenal kusukela eleminyaka yokuzalwa eyisithupha.
Ngemva kweminyaka elitshumi lanye, umfana lo utshengise ukuba umdlalo wakhe uyisibonakaliso esihle njalo lebhodi ye-Arsenal ilethemba elikhulu ekuthuthukisweni kwakhe.
Useke wadlala kakhulu kuma-Under-18 lama-Under-21 njalo ngomnyaka odluleyo wayeqeqetsha leqembu elikhulu ngaphambi komdlalo we-Uefa Champions League leqembu le-Real Madrid.
Injongo yakhe enkulu okwakhathesi yikungena eqenjini elikhulu le-Arsenal. Kodwa, abalandeli bafuna ukubona ukuthi uzakhetha ukudlalela iZimbabwe kumbe iNgilandi.
Ekhuluma ngemva kokuvumelana le-Arsenal kuliviki, uMurisa uthe: “Ngiyajabula kakhulu ngokufeza iphupho lami lokusayina inkontileka yokuqala ku-Arsenal. Sengikuleli iqembu kusukela ngileminyaka eyisithupha, ngakho lokhu kutsho okunengi kakhulu kimi.”
Umkhokheli weZifa Global and Diaspora Initiatives, uMarshall Gore, uyamhalalisela uMurisa.
“Ngiyamhalalisela kakhulu umdlali lo ozalelwe e-England kodwa engowaseZimbabwe, uTeshaun Tarumbidzwa Murisa, ngokusayina inkontileka yakhe yokuqala le-Arsenal F.C,” nguGore lo.
“Waqala kuleliqembu eleminyaka yokuzalwa eyisithupha nanko ukhulele kulo waze waphiwa ikontileka eseleminyaka engu-17. Lokhu kuyimivuzo yeminyaka yokuzinikela, ukuziphatha kuhle lokukholwa.
Uzakuba ngumzekeliso kwabanye abadlali abasakhulayo eZimbabwe. Uhambo lusanda kuqala, ikusasa lakhe livulekile.”
Uthe ukukhethwa kukaMurisa kubonisa ukuthi banengi abadlali abadabuka kuleli asebephumelela kumaqembu amakhulu phetsheya.
