admin
UMGADLI ovuthayo kunguqu uNyasha Mushekwi kubikwa uyehluleka ukugcina umkakhe uLuminitsa lomntanabo oleminyaka emine yokuzalwa.UMushekwi ulodumo kunguqu ngokudlalela amaWarriors leqembu leMamelodi Sundowns eGoli.
Abalandeli benguqu kwele-South Africa laseZimbabwe abazi ngempilo kaMushekwi bayakufakaza lokhu.
Lephephandaba le-Sunday Sun libika ukuba uLuminitsa usephila njengesiboto kwele-South Africa. UMushekwi utshiye imuli yakhe le ngesikhathi esuka kuqembu leMamelodi Sundowns esiya ku-KV Oostende eBelgium.
Kubikwa abangane bakaLuminitsa batshayele iSunday Sun ucingo bedinga amaqhinga okunceda imuli kaMushekwi le esihlaselwe yibuyanga.
“ULuminitsa uphila kanzima. UNyasha kamenzeli lutho njalo kanakekeli ingane yakhe,” kutsho umngane oseduzane.
Omunye umngane wemuli kaMushekwi uthe uMushekwi wake waxotsha umkakhe uLumitsa lomntwana endlini yabo eMidrand eGoli.
“UNyasha wafika endlini elabafazi abathathu watshela uLuminitsa ukuthi apakitshe impahla aphume.
“Wamxotshela phandle lomntwana. Khathesi usebuhlungwini uLuminitsa ngoba kazi ukuthi aqale ngaphi ngempilo ngemva kokutshaphazwa nguMushekwi,” kubika umngane oqotho.
Abangane bemuli le bathe uLuminitsa ulenhloni zokucela uncedo.
Ebuzwa zintatheli, uLuminitsa ubhavuke wathi: “Angikhulumi ngezomdeni wami kumaphephandaba. UNkulunkulu uzangisiza ngelinye ilanga.” — Ubulembu
Online Reporter