adminCornelius Luphahla
KULENINA lesigabeni seGomoza eLupane elitshiye izakhamizi zakule indawo zinkemile ngemva kokuveza esililweni somntanalo ukuthi belingaqondanga ukubulala lo ongasekho kodwa oyisigoga ukuze litshaye amabele.
Inina leli uNkosazana Sibongile Moyo kubikwa umuthi lo lawuphiwa yinyanga okuthiwa nguBhulani.
Isiga lesi senzakale kuviki ephelileyo lapho uNkszn Moyo umkaMnumzana Luckson Nkiwane abhujelwe khona ngumntanakhe uSisa Ndlovu ngemva kokuphiwa umuthi wamabele yinyanga le okucatshangelwa ukuthi ubuzasebenza ukubulala umntanakhe oyisigoga kwasekusifa ongayisuye.
UMthunywa uxhumane loNkosazana Abigail Mlotshwa oyisakhamuzi sakule indawo wathi kalankani ngoMaMoyo ngoba wazikhulumela yedwa esililweni ukuthi ubekhangelele ukuthi kufe umntanakhe oyisigoga.
“Angilamathe ngesenzo esenziwa nguMaMoyo ngoba kwathi ngesikhathi umntanakhe sebhubhile wakhala ezigiqa phansi ngemva kwalokho wathi kuthi kakhulume. Lokhu kwethusa abantu bethi mhlawumbe sehlanya kanti uyakwazi akutshoyo.
“Sithe simbuza ukuthi kuthi akhulumeni wathi uzwa ubuhlungu ngoba bahamba enyangeni uBhulani lomkakhe yafika yabapha umuthi wamabele yathi singawusebenzisa sizafelwa ngumntwana oyisigoga. “Wathi osokumzwisa ubuhlungu yikuthi sokufe umntanakhe amthandayo onguye obebasiza,” kutsho uNkszn Mlotshwa.
UMnumzana Xolani Ncube ubikele intatheli ukuthi okumethusayo yikuthi uMnu Nkiwane wayengelandaba lokufelwa ngumntwana ezihlekela.
“Mina okwangethusayo yikuthi uNkiwane wayengelandaba lokuthi ufelwe ngumntwana ekhanya ezihlekela nje angani usemdlalweni. Kwakuthi nxa abantu bemkhulumisa athi bayekhulumisa umkakhe yena bamekele. Lokhu kwenza ngacabangela ukuthi kuyamjabulisa ukufa komntanakhe ngoba sezatshaya amabele.
“Kusukela khonapho sengibesaba uNkiwane lomkakhe ngoba bagangile sibili,” kutsho uMnu Ncube.
Ebuzwa ngale indaba uNkszn Moyo uthe yena uzwa ubuhlungu kakhulu njalo kazange wayadinga umuthi wokubulala enyangeni, wayedinga usizo.
“Ukuhamba enyangeni uBhulani ngahamba kodwa ngangingayidinga umuthi wokubulala ngangisiyadinga usizo nje.
Ngakho ngizwa ubuhlungu emoyeni wami ngokufelwa ngumntanami ngakho ngeke ngikhulume lutho ngoba ngisakhala,” kutsho uNkosazana Moyo.
Imizamo yokukhulumisana loMnu Nkiwane yehlule ngoba ucingo lwakhe lwalile ukungena.
Online Reporter