admin Johas Moyo
IZAKHAMIZI zeLuveve edolobheni lakoBulawayo zethuke zoma ngesikhathi zivuka ekuseni zithola isalukazi sibhunyumunyu esitaladeni andubana sicatshe ngomunwe sithi impahla zithethwe ngumoya.
Isiga lesi senzakale kuviki ephelileyo lapho ugogo uMaNyoni abonakale egqoke isudu yokuzalwa ekuseni esitaladeni esiseduze lamangcwaba eLuveve okwenza kwacatshangelwa ukuthi ngumthakathi obevela ganga waseselwa.
Kubikwa uMaNyoni uhlala eNew Luveve.
Umfakazi oqotho okhulume ngaloludaba loMthunywa uNkosazana Lindsay Mkhwananzi oyisakhamuzi sakuleyondawo uveze ukuthi yena wazibonela ngawakhe amehlo isalukazi lesi sizihambela cala celeni sibhunyumunyu sivelela emangcwabeni.
“Ekuqaleni ngangithi mhlawumbe ugogo lo kaphilanga kuhle engqondweni kodwa sathi sesikhuluma laye sezwa ukuthi uphelele engqondweni.
“Lanxa ngikhuluma lawe nje ngilokhu ngingelankani ngengakubonayo. Kambe umuntu omdala osengaze ahambe enqunu ilanga libalele,” kutsho uNkszn Mkhwananzi.
Uqhubekele phambili esithi okunye okwabamangalisayo yikuthi ugogo lo lanxa wayekhanya ephile kuhle engqondweni yikuthi bathi bembuza ngempahla wathi ziphetshulwe ngumoya.
“Okwasidanisa kakhulu yikuthi abantu bathi bembuza ngempahla wathi ziphetshulwe ngumoya kodwa-ke isimanga yikuthi ngumoya bani ongaze ukhulule umuntu impahla zonke,” kutsho uNkszn Mkhwananzi.
UMthunywa uzwe njalo ukuthi isalukazi lesi kasiqalisi ukwenza isiga esifana lalesi ngoba ngomnyaka ophelileyo wabonakala futhi emangcwabeni esenza imithanithani engapheliyo okucatshangelwa ukuthi engabe ephathelane lobuthakathi.
UMthunywa uxhumane loMnumzana Thabani Magagula oyisakhamuzi yena oveze ukudana lokudideka ngalesosiga.
“Sabizwa ngumkhosi wabantwana sebebone isalukazi sinqunu sona sabaleka sangena komakhelwane lapho esaphuma khona sebesithandele ngezambiya okwenza abantu bacina bengasamhlukuluzi,” kutsho uMnu Magagula.
Uqhubekele phambili esithi bathi bebuza isalukazi lesi sathi sivela endaweni zaso.
“Ugogo lo simbuza ukuthi kungani engagqokanga wathi uvela endaweni zakhe yena, abantu bayamhlolela ngokuthi uyaloya. Simbuza ngempahla wathi ziphetshulwe ngumoya zahamba wasala enqunu,” kutsho uMnu Magagula.
Ukhansila wakule indawo uTamani Moyo laye uvumile ukuthi indaba le wayizwa.
“Kuliqiniso sibili ukuthi kulesalukazi esabonakala eLuveve sibhunyumunyu sathi impahla ziphetshulwe ngumoya.
Okunengi kangizange ngikudinge kakhulu,” kutsho uKhansila Moyo.
Online Reporter