Online Reporter
Ethel Ncube
UTHABE wabamanzi undoda ophatheka kakhulu kunkundla zokuxhumana njalo encedisa ukuxhasa abaculi beZimbabwe eMzansi Afrika ngesikhathi ebusiswa ngesipho semali edlula R100 000 ngelanga lakhe lokuzalwa eMzansi.
UPhilani Brandi Ndovu ubethakazelela ilanga lakhe lokuzalwa eNewlands eMzansi kumaviki asanda kwedlula lapho abalandeli labangane bakhe abambonise uthando olukhulu ngokukhunga ngezipho ezitshiyeneyo.
UPhilani ungomunye owathenga i-CD leNsimbi zeZhwane nge-R10 000.
Ekhuluma lentatheli uveze ukuthaba lokubonga okukhulu kakhulu ngakwenzelwe ngabantu eMzansi.
“Ngithanda ukubonga kakhulu ebantwini abasebenze nzima ekubeni ilanga lami lokuzalwa lithakazelelwe eMzansi. Bengiqala ukuba lomcimbi ongaka. Uthando engiluthole ebantwini luyangethusa kakhulu. Abangane labalandeli bami banginikeze isipho esemali eyedlula R100 000 kanye lezinye izipho. Ngikubonile ukuthi ngempela abantu balothando olumangalisayo.
“Mina angisuye mhlabeleli kodwa ngixhasa abahlabeleli ngokuphakamisa imiculo yabo ngibasekela ukuba imisebenzi yabo ikhule njalo yaziwe ngabantu abatshiyeneyo,” kutsho uPhilani
Ubuye waveza ukuba lokho akwenzelwe ngabantu eMzansi kutshengisela ukubambana okukhulu.
“Angilawo amazwi amanengi bantu bakithi ngithi kini lonke lizizwe libongiwe endaweni ezitshiyeneyo, ngeke ngiliqambe lonke ngamagama kodwa ngithi uthando lwenu lukhulu njalo indlela eliphakame ngayo lisiza emcimbini ngizizwa ngijabulile,” kuphetha uPhilani.
