Online Reporter
Nkosilathi Sibanda loFungai Muderere
ENGABE engabutholi ubuthongo umqeqetshi weChicken Inn uJoey Antipas nxa ekhangele isimo seqembu lakhe eselidlalela ukuthi lingaphumi kuPremier League kulisizini.
Sekusele imidlalo emine ukuthi kugqitshwe isizini.
IChicken Inn ikhuthe ugatsha kumdlalo wayo leScottland ngoLwesihlanu ngeviki edluleyo, inqotshwa 1-0, kuhlohle uTymon Machope enkundleni yeBarbourfields.
Ukubona iqembu lakhe selibheke izembe kuyamdanisa u-Antipas.
“Kuyadabukisa ukuthi siphinde sehlulwa. Sinikeze iScottland inhlonipho enkulu, ikakhulukazi kubadlali bayo abazingcitshi. Njengoba sekusele imidlalo emine ngaphambi kokuphela komkhankaso, engingakutsho yikuthi umzabalazo uyaqhubeka,” kutsho u-Antipas, umqeqetshi owathwala inkezo yeCastle Lager Premiership eleChicken Inn ngesizini ka-2015.
Uthe kumele baqinele imidlalo elandelayo.
“Yonke imidlalo eseleyo kufana lokuthi ngeyokucina. Kumele sidlale ngamandla ngoba sikusimo esibi. Umdlalo wethu olandelayo siyabe sileTriangle ngakho sizabopha ziqine,” kutsho umqeqetshi lo.
AmaGamecocks kazange abelesizini enhle lonyaka. Umkhankaso wawo ubuveza ukuthi iqembu kaliqinanga kangako, ikakhulu kubagadli lasemuva. Ibikhona imidlalo lapho ebihlohlwa khona lula, kuvele ukuthi imvimbi ziyavuzisa ngemva kwegedi. Abagadli badlalise amathuba amanengi okuhlohla, kwenza iqembu lehla kungalane yeCastle Lager.
Okwakhathesi iphethe imiklomelo engu-33, isendaweni yesi-13. Kulindawo, kulamaqembu amane aphethe imiklomelo efanayo agoqela iTriangle ekunombolo yesi-12, kubuye iDynamos, Bikita Minerals. Zonke zidinga ukubaleka kulindawo ngoba iseduzane lezembe. Phansi kule leGreenfuel (31) leYadah (30).
Ukudliwa kweChicken Inn kumidlalo ezayo, kuzayivulela indlela yokuya kuDivision One ngomnyaka ozayo.
Phezulu kwengalane akukhulunywa okunengi. Kuyacaca ukuthi umbango wesicoco seCastle Lager uphakathi kweScottland, Simba Bhora, MWOS leTelOne.
IKwekwe United eqeqetshwa nguMasimba Dinyero isiphumile emncintiswaneni.
