Online Reporter
Nkosilathi Sibanda
UMDLALI wamaWarriors ophinda abekuqembu leLuton Town kweleNgilandi, uMarvelous Nakamba usevuselele ithuba labadlali beNjube HotSpurs lokuthi bayedlala eBelgium.
Lokhu kuvezwe ngempelaviki edluleyo ngesikhathi iNjube Spurs inikezwa isicoco sokuba yintshantshu yeligi yama-Under 17, engaphansi kweZimbabwe Foootball Association (Zifa) esabelweni sakoBulawayo.
INjube HotSpurs liqembu elixhaswa nguNakamba ngenjongo yokuphakamisa ithalenta elisacathula emdlalweni. Izakhamizi zelokitshini leNjube zibike ukuthi ukubakhona kwaleliqembu sekuguqule impilo zabantwababo ngoba sebetshona belolonga, okubasusa ezitaladeni lokubavikela ukuthi bengasebenzisi izidakamizwa.
Ngaphansi kweMarvelous Nakamba Foundation, abadlali abasakhulayo sebebonise ithalenta labo, abanye benelisa ukuthi bakhuphuke baye kumaqembu adlalela kumaligi aphezulu.
Kulabo okukhangelelwe ukuthi bayezama inhlanhla eBelgium, kuloThabile Zulu loMichael Tembo.
Bekhuluma lentatheli, abadlali laba bathe bakhangelele okuhle kwelakusasa.
“UMarvelous Nakamba uyasikhuthaza ukuthi sidlale ngcono kulaye, senze okukhulu ngomdlalo wethu. Siyambonga ngethuba esilitholayo. Okumele sikwenze yikuthi sifike sidlale kuhle, sithole ithuba lokukhethwa,” kutsho uTembo.
UZulu uthe bazafika bejabulise abaqeqetshi.
“Siwulindile umango wokuya eBelgium. Sifuna ukudla njengoNakamba.”
Iqembu leNjube Spurs lilabadlali abaleminyaka yokuzalwa eqalisela kweyisitshiya galombili kusiya kumatshumi amabili.
Esinye isakhamuzi seNjube, uDuncan Masina uthe uNakamba usencedise kakhulu ukukhulisa intsha yeNjube.
“Kuyabongeka okwenziwa nguMarvelous. Sesibona abantwabethu bechitha isikhathi besenkundleni. Kabasoke bathole isikhathi sokuba ezitaladeni labanye babo abanatha utshalwa lokunye okudakayo. Yikho esikujabulelayo,” kutsho uMasina.
UNakamba ngomnyaka ka2022 wasekela ukuqhutshwa komqhudelwano wenguqu owadlalelwa ngamaqembu asakhulayo avela endaweni ezitshiyeneyo elizweni.
