adminNcekwenhle Ncube
KUDABA olutshiye izakhamizi zeNyamandlovu zihleli manzonzo kulosobhuku okubikwa uthwalise esinye isakhamuzi imitshaqana yaso safulathela umuzi ngemva kokuba kube lokungazwisisani kubangwa impuphu.
UMthunywa ongelampontshi uzwe ukuthi indabamlonyeni le yenzakale esigabeni seLongsdale eNyamandlovu.
Kubikwa uSobhuku uNeeboy Ndlovu wacela impuphu kuMnumzana Nkosana Mpofu ogcine umuzi kaLot Ndlovu njengoba esebenzela phandle kwelizwe.
Kubikwa ekufikeni kwakhe ecela impuphu wayiswela okwenza wazonda kakhulu wasebaxotsha esigabeni ethi baphume emhlabathini lo abakiwo ngoba bengawuphiwanga ngokusemthethweni.
Omunye umfakazi oqotho (igama silalo) oyisihlobo sikaMnumzana Lot Ndlovu uthe usobhuku lo uyazipha isikhundla lesi yikho nje efuna ukuzenzela umathanda ebantwini.
“Thina ubusobhuku bakhe asibazi. Uzinike isikhundla sikaTendai Dube yikho nje ekhanya efuna ukwenza uchuku ebantwini khona bezamesaba.
“Indaba yokuthi kwabangwa impuphu sayizwa lathi sikhonapha. Wathi sesizwa ukuthi abantu sebezwile ukuthi waxotsha uMnu Mpofu ngenxa yempuphu waphika ngoba esebona ukuthi kulihlazo,” kutsho umfakazi lo ongathandanga ukuqanjwa ngebizo.
Kuzwakale ukuthi ngemva kokuxotshwa kukaMnu Mpofu usobhuku lo wathatha umuzi lowo wahlalisa uNkosikazi Fadzai Sibanda.
Impahla lakho konke okukaMnu Mpofu kwaphoselwa ngaphandle komuzi.
UMnu Mpofu ubikele uMthunywa ukuthi usobhuku wathi emxotsha wamthembisa ukumtshisela endlini.
Imizamo yokukhulumisana losobhuku uNdlovu yehlule ngoba ucingo lwakhe belungangeni kwaze kwafika isikhathi sokudindwa kwephephandaba.
Umlisa kulesi isigaba uchaze ukuthi isizatho esabekwa ngesikhathi kususwa uMnu Mpofu ngesokuthi kabambisani labanye ekulwiseni inhlupho zesigaba.
“Nguye olomlomo uMpofu. Wala lamanzi kazulu kanti njalo nxa kulemali ezibhadalwa ngabanye yena kafuni ukwenza lokhu. Kungakho nje lami ngathi kuhle abuyele lapho abehlala khona.
“Kungaba khona ukungazwisisani kwakhe loSobhuku uNdlovu kokunye kodwa kwezami indlebe bekungafikanga,” kuchaza uMlisa uNcube.
Online Reporter