admin
Thokozile Mbedzi
ZILOKHU zinkemile izakhamizi zesigabeni seDheka eLupane ngemva kokuba enye indoda ihambe yayabulala enye emzini wayo ngeviki ephelileyo.
Kubikwa Jerot Sibanda oleminyaka engu-61 yokuzalwa uhlahlelwe ngehloka elele wahle wafela ebuthongweni nguGilbert Ndlovu oleminyaka engu-33.
Kubikwa uNdlovu waqonda emzini kaSibanda ehlomile ekuseni wafika wazithela ekamelweni lakhe lokulala.
Ekhuluma lentatheli kaMthunywa uMnumzana Fikile Dube uthe kuyisimanga esikhulu kibo ukuthi umuntu angayangenela enye indoda emzini wayo ayibulale.
“Yisimanga esikhulu ukuba uSibanda ungenelwe yindoda emzini wayo ihlomile yamhlahlela waze wafa.
“UNdlovu wafica uSibanda ezilalele endlini yakhe wamhlahlela kabili ekhanda njalo amanxeba akhona ayetshona. Wamfulathela wamtshiya ephakathi kwechibi legazi,” kulandisa uDube.
Kubikwa wathi esuka lapho esehambe isibanga samamitha angaba ngu-50 wahlangana lendodana kaSibanda uBhekimpilo yena owananzelela ukuthi uphethe ihloka elilegazi.
Kubikwa uBhekimpilo wathi ebuza uNdlovu ukuthi uvela ngaphi wathi uzamgamula ngakho wahle wabaleka.
Uthe efika ngakibo wathola uyise evele esedlule emhlabeni njalo ephakathi kwechibi legazi.
UBhekimpilo wahle wabikela izakhamizi zona ezahle zaphuthuma lepholisa lesigaba uNdlovu wahle wabotshwa lipholisa lesigaba,” kulandisa uMnu Dube.
Online Reporter