admin
Thokozile Mbedzi
KULENDODA yesigabeni seMusungamhala eLupane emiswe phambi komthethwandaba ngecala lokutshontsha inkomo.
UJabulani Chamiti oleminyaka engu-30 umiswe phambi kukamantshi uNdumo Masuku ngeviki ephelileyo esetheswa icala lokutshontshela uBetty Numeri inkomo.
Umtshutshisi kulelicala uMnumzana Clive Gumbo ubikele inkundla ukuthi mhlaka 28 Mabasa umsolwa wafika emzini kaNumeri ngemva kokuzwa ukuthi uthengisa inkomo.
Kubikwa uNumeri waveza ukuthi inkomo yakhe uyithengisa nge5 000 Rands njalo basebekhulumisana andubana uJabulani athembise ukuthi uzaphenduka eselemali.
Inkundla izwe ukuba umsolwa wathi esuka koNumeri waya lapho okugcinwe khona inkomo koKhumbulani Sibanda wafika wathi inkomo useyithengile kungakho usezoyithatha.
Kubikwa wayiqhuba waya layo emzini wakhe.
Ngemva kwensuku ezimbalwa uSibanda waqonda emzini kaNumeri esesiyambikela ukuthi inkomo uJabulani sowayithatha.
Wethuka uNumeri ngoba wayengazange anikwe ngitsho indibilitshi ngumsolwa wahle wayabikela amapholisa.
Umantshi esethula isigwebo ngemva kokuhlolisisa udaba lolu ubikele inkundla ukuba umsolwa kaziphathanga ngendlela eqondileyo.
Unikwe ibheyili njalo walaywa ukuthi kumele anike uNumeri iRTGs$10 000 njalo akumelanga ahlangane labafakazi.
Umsolwa uzaphinda abuyele emthethwandaba mhlaka 4 Lwezi.
Online Reporter