Online Reporter
Ethel Ncube
IMBONGI yeMatabeleland South uLerato Nqindi Ndlovu ihlonitshwe ngesicoco kumkhosi weMiklomelo kaDakamela, okwenze yazizwa iphakanyisiwe ngempela.
UNqindi uthole isicoco sokwenza kuhle ekuhayeni inkondlo.
Imbongi le, itshengisele ukuthokoza okukhulu ngokuphakanyiswa ngenxa yemisebenzi yayo yokuhaya inkondlo.
“Ngithanda ukuzehlisa phambi kwenduna uDakamela kanye lomphakathi wonke waseNkayi, angazi ukuthi ngibonge ngithini ngokungipha umklomelo.
“Lokhu kutshengisa ukuba imisebenzi yami yokuhaya inkondlo iyabonakala endaweni zonke jikelele nje. Mina ngiyaqala ukuza kumcimbi lo, wenduna yethu yeNkayi, lamuhla ngingoweNkayi, ngiyathokoza ukuphiwa ithuba ukuba ngize lapha njalo ngihaye ngitshengise imisebenzi yami,” kutsho uNqindi.
Uqhubekele phambili eveza ukuba ukuthola kwakhe isicoco kumenza abelomdladla lothando lokuqhubekela phambili.
“Ukuthola kwami umklomela lapha eNkayi kungenza lami ngibe lamandla okuqhubekela phambili ngisebenza gadalala ngisenzela abantu inkondlo ezitshiyeneyo. Ngibonga ngingaqedi ngoba lamhlanje induna yethu uDakamela isifake ekukhanyeni lamuhla umhlaba wonke usuyazi iNkayi.
Lathi ngenxa yomcimbi we-Imiklomelo kaDakamela sesisaziwa endaweni ezikhatshana, lokhu kuyasikhulisa sizimbongi njalo kusivulela amathuba amahle okuthola imisebenzi kwezinye indawo ngoba abantu besibonile koDakamela.
“Ngibonge kubalandeli bami, kubantu beNkayi lasenduneni lakubo bonke abasebenze nzima ukuthi benelise ukuba umcimbi omkhulu kangaka uphumelele,” kuphetha uNqindi.
