Online Reporter
Lovemore Dube
U-ASHLEY Lupondo wakoBulawayo usebengowakuqala ukumela ilizwe kubanga eliphezulu kumdlalo we-vaulting.
Umdlali lo usanda kuvela kumidlalo yomhlaba wonke jikelele njalo lumdlali utshengisele ukuthi ulethuba lokuya kude ngalumdlalo.
Umdlalo lo ulesikhathi ukhona kuleli kodwa awumemethekanga njenge-show jumping le-dressing lapho amabhiza eqa khona imigoqo.
UGayle Hanssen ongunobhala jikelele wemidlalo yamabhiza uthe kuyakhwabitheka ukuthi lumdlalo uyaqhela eZimbabwe njalo abayibo abanengi kuleli sebephatheka kuwo.
Uncome indlela uLupondo adlala ngayo. “Usenze kuhle ukuphakamisa ilizwe lethu ngalumdlalo. Akwandanga ukuthi sibe lomdlali osimelayo kubanga eliphezu kangaka.
Wenze kahle lanxa engatholanga isicoco.
Esikujabulelayo yikuthi usebizwe kweleNetherlands, lapho okulabaqeqetshi abafuna ukumlolonga. “Okwesikhathi esedluleyo ubeseSouth Africa. Ukuya emazweni kungenza afike kuzinga lentshantshu zomhlaba nxa engasebenza gadalala,” kutsho uHanssen obekoBulawayo ku-
Horse of the Year Show, enkundleni yeZimbabwe International Trade Fair, ngoLwesibili.
Umdlalo lo ubuthanise abathakazelela ukugada amabhiza abavelela eHarare lakoBulawayo. Bekukuhle, kusiba luthuli phezu koqethu kuncintiswana, kudingwa intshantshu zalonyaka.
Umdlalo wokucina womnyaka uzaqhutshelwa eHarare ngoMpandula. Abanye akade bekhona nguTerry Angelos loKeely Downey abasanda kuvela kuma-Africa School Games abeseAlgeria.
Bobabili bathe kwabalezifundo ezinengi ezajulisa ulwazi lwabo ngalumdlalo okuyikho okuza baphathisa ukuthi benze ngcono.
