admin
Thokozile Mbedzi
ZILOKHU zithithibele izakhamizi zesigabeni seMadlambuzi ngemva kokuba enye indoda igalule yafa ngemva kokuphikisana labangane bayo ngeviki ephelileyo.
Kubikwa uFelix Ngwenya watshona ezinathela labangane bakhe ezitolo koHingwe.
Sokuhlwile sebekhumbula emakhaya yikho lapho abafika khona emfuleni uMayitengwe bafica uthelile ngakho uFelix waphikisana labangane bakhe lapho besithi ngcono bebuyele ezitolo ngoba ngeke bachaphe yena wala ngakho bacina bemtshiya lapho. Ekhuluma lentatheli kaMthunywa uMnumzana Thembelani Ncube ongomunye wabomakhelwane uthe lokhe bemangele ngesimanga esibayehleleyo lapho esithi.
“Lokhe simangele njengomakhelwane silapha ngesiga esisehleleyo lapha esigabeni sethu. Kuyasethusa ukuthi kungani uFelix ebe lokwehlula abantu bonke ayelabo labo babuyela emuva bamtshiya esithi yena kalali ezitolo uya emzini wakhe wona umfula ugcwele. Abanye bakhe bacina bebuyela emuva yena wahle wakhupha ibhanti wathatha iphephabheki wafaka ifoni yakhe lezicathulo wazibophela eqolo wasengena emfuleni abanye bakhe sebebuyele emuva.
Ngokuswelakala kwenhlanhla wahle wathathwa ngumfula wagalula wafa. Abangane bakhe labo ekuseni bavukela ukuyachapha umfula usuyentshile baya emakhaya abo baqala imisebenzi yabo njengensuku zonke bezitshela ukuthi indoda elesibindi ihle yalala ifikile egumeni layo kanti ngitsho.
Bamangala unkosikazi wakhe esemdinga ethi ulele engabuyanga, yikho uhlangana abantu besiyamdinga lapho abamtshiya khona izolo emfuleni bamthola eduzane nje esefile njalo zonke izinto zakhe elokhe ezibophele elazo kungela okulahlekileyo.
Thina njengezakhamizi siyabonga ukuba simbonile ngoba besizaba lokusola abacina ukuba laye kukanti labo babengela sici, yena waba lesibindi esingayisiso. Khathesi setshiye imuli yodwa lobunzima bonke obukhona,” kulandisa uMnu Ncube.
Isikhulumi samapholisa uInspector Loveness Mangena ebuzwa ngodaba lolu uvumile wathi sokufilie ehofisini labo ngakho bahlala bekhuza ukuba abantu kabaxwayane lomkhuba wokungena emanzini ngoba kulengozi, abantu balahlekelwa yimpilo lapho esithi.
“Abantu sihlala sibaxwayisa ukuba bengangeni emanzini ngoba kulengozi. Abantu kabatshiyane lomkhuba lowu ukuze singalahlekelwa yimpilo mahlayana njengalokhu njalo abalalele nxa bexwayiswa,” kuphetha uInsp Mangena.
Online Reporter