admin
Intatheli kaMthunywa
KULENDODA ehlala elokitshini leHatfield edolobheni leHarare ethi iphose yawutshiya umhlaba ngemva kokuba ixhwathise imbanje yazidla ithi yelapha isisu.
Indoda le igule yaze yayaphendukela esibhedlela.
UElton Munjanja oleminyaka engu-24 njalo engaboni emehlweni, ohlala kukheli ethi, 2 Obby Close eHatfield uthi waphiwa imbanje nguMunyaradzi Manjeese ongumngane wakhe.
“Mina ngiyadla izidakamizwa ezigoqela imbanje njalo ngiyamthanda uMagwebu ngaso sonke isikhathi. Kangisebenzi ngiphila ngokweboleka abantu imali besebeyiphendukisa isizele.
“Umngane wami uMunyaradzi Manjeese ngumnikazi wendlu lapho engiloja khona, njalo uyazi ukuthi mina ngiyasebenzisa izidakamizwa, nguye owangiphathela imbanje esithi ziyagezisa isisu.
Wathi ngiqale ngizixhwathise lakanye ngakwenza lokho, ngasenginatha umsobho wakhona, ngabuya ngadla ezinye imbanje sengathi ngidla umbhida,” kutsho uMunjanja.
Uthi wavuma ukwenza lokhu ngoba ehlutshwa yisisu esihlala sibuhlungu njalonje.
“Imbanje lezi ngaziphiwa ngeviki ephelileyo ngoLwesithathu ngasengizixhwathisa okwesikhathi esifitshane nje ngathatha umsobho ngawunatha amahlamvu ngadla.
Ngaleso sikhathi ngazizwa ngilamba kakhulu, ngaqala ukuphela amandla ngiginqa ngapha ngitshiselwa kakhulu.
“Ngazama ukusukuma ukuthi ngiphume phandle ngehluleka ngaze ngenza okokubambelela emdulini ngibiza umama uMasunda esihlala laye,” kutsho uMunjanja.
Uthe wenelisa ukuphuma wasesiwa phandle lapho okwakulo Munyaradzi Manjeese owamthwala ngemota wamhambisa esibhedlela.
Esibhedlela wafika wanikwa umbheda.
“Ngafakwa i-drip ngahlatshwa amajekiseni ngasengiphiwa umbheda ngahlala esibhedlela okwezinsuku ngaze ngaba ngcono.
Ngambuza uMunyaradzi ukuthi bekuzimbanje mhlobo bani anginike zona wathi ucabanga ukuthi zazihlanganiswe lokunye okungayisikho,” kutsho uMunjanja.
“UManjeese lomunye wakhe uRobson Dara ngabazi ngithengisa imvundla engangiyifuya lapha eHatfield kwaze kwafika ekuthini ngibaboleke imali.
Khathesi balemali yami engababoleka ukuthi bakhulise amabhizimusi abo kodwa abasafuni layo lokho sokungenza ngicabange ukuthi uMunyaradzi ubefuna ukungibulala,” kutsho uMunjanja.
Ebuzwa ukuthi ukugula lokhu bekungenziwa yikudla izidakamizwa kakhulu, walile wathi waqala kudala ukudla izidakamizwa kakaze agule ngalindlela.
“Khathesi ngiyagula umzimba wami uphela amandla.
“Ngiyakwazi ukuthi imbanje ziyabophisa kodwa ngibhema ngicatshile,” kutsho uMunjanja.
Isikhulumi samapholisa elizwe uAssistant Commissioner Paul Nyathi, ebuzwa ngodaba lolu uthe umphakathi kumele uhlale usazi ukuthi kulicala ukubhema loba ukuthengisa imbanje lokuzilima kungela mvumo.
UNkosazana uEustina Takawira Masunda oleminyaka engu-20 ohlala lapho okuhlala khona uMunjanja ugcizelele ngokugula kwakhe wathi waphosa wafa.
“Ngezwa uMunjanja ememeza esithi usesifa esendlini yakhe ngasengigijimela khona ngamthola ehamba ebambelela umduli esithi udliswe imbanje ezilezidakamizwa. Wahanjiswa esibhedlela nguMunyaradzi wayakwelatshwa,” kuchaza uNkszn Masunda.
UDara lo ongumngane kaMunjanja lo Manjeese uthi watshelwa indaba nguMunjanja esithi uphiwe imbanje ezimgulisileyo.
“Kuliqiniso, uElton Munjanja wangixoxela indaba ethi uphiwe imbanje nguMunyaradzi azixhwathisayo wazidla zamgulisa engasazi lakade ekwenza,” kutsho uDara.
Uthi imali ayiboleka kuMunjanja yiUS$300 njalo uzambuyisela ngokuya kwesikhathi.
UManjeese watshelwa ngendaba yakhe yokunika omunye wakhe imbanje ezamgulisayo wangathandi ukukhuluma ngakho ngokugcweleyo.
“Ujaha lo, uElton Munjanja ngiyamazi sihlala sonke.
Elingibuza khona kuhle ngabe siyabonana ngoba khathesi lenze okukutshaya ucingo.
Ngizaphenduka kini ngisaqedisa okunye engikwenzayo.
Lingangipha inombolo zenu zefoni,” kuphetha uManjeese.
Online Reporter