admin
YiNtatheli kaMthunywa
ABATSHAYELI bezimota koBulawayo sebezabhadala imali efika iUS$400 ngenyanga kubhadalwa ukupaka izimota enzikini yedolobho.
Lamuhla ikhansili yaleli idolobho isungule uhlelo lokuthi yonke imota epakwa esitaladeni kumele ibhadale umthelo oqalisela ku$1 ukupaka okwemizuzu engu-30.
Inkampani yeTrendy Three International yiyo enikezwe umsebenzi wokuphatha loluhlelo. Lokhu kuze kwabazindaba ezithinte abatshayeli kabuhlungu ngoba inengi elisebenza edolobheni, lizabhadala imali engange US$16 ngelanga.
Abatshayeli abasebenza amalanga ayisithupha ngeviki phakathi edolobheni sebengazithola sebebhadala imali engange US$100 ngeviki kumbe US$400 ngenyanga.
Ikhansili yakoBulawayo kumbiko wayo ithe idolobho lizakwehlukaniswa libe zingxenye ezintathu, njalo ukumisa imota kuyabe kusiya kukhwela nxa umtshayeli engena enzikini yedolobho.
Imali ka Zone 2 izabe iyi US$1 ngehola kukanti eka Zone 3 izabe iyi US$1 amahola amabili.
UBongani Nyathi ongumphathi weParking Solutions uthe kusukela lamuhla, bazaqala ukubhadalisa abantu.
“Imtshina yethu yokusebenza ifikile emavikini amabili adlulileyo ngakho besesiqalile ukusebenza emgwaqeni kaJason Moyo Avenue. Sikwenza ngezikhathi ezitshiyeneyo njalo sizimisele ukwenza indawo zokumisa izimota eziyi-1 000 edolobheni lapho okuzaba lendawo zokumisa izimota ezinengi,” kutsho uMnu Nyathi
Uthe eminye imigwaqo engaphansi kuka phase 1 kuzagoqela indawo ezinjengo Five Street loJoshua Mqabuko Nkomo phakathi kuka 8th lo 11th Avenue, Leopold Takawira Avenue.
“Sisebenzisana le-BCC njalo sifake imali engange US$2.2 million. Uhlelo lwethu ngolokuthi sithole ukusebenza okufika ku 70 phesenti, kuthi i-BCC ithole 30 phesenti ngoba thina sibuya lezikhali zokusebenza njalo yithi esiphethe uhlelo,” kutsho uMnu Nyathi.
Online Reporter