admin
UMQEQETSHI we-Al Ahly, uPitso Mosimane uchaze iKaizer Chiefs njengeqembu angaziyo ukuthi kumele alindele ini kulo kodwa uthe uyayihlonipha njengoba bezodibana lalo kumidlalo yokucina yenkezo yeCaf Champions League.
Amaqembu la angene kulesi isigaba ngemva kokuba ngempelasonto, eqedele umsebenzi emidlalweni yesigaba sesibili esandulela umdlalo wokucina kulinkezo.
I-Al Ahly kaMosimane idle i-Esperance ng E-3-0 emdlalweni wesigaba sesibili ngoMgqibelo ebusuku eCairo, e-Egypt. Yayinqobe kumidlalo yakuqala eTunisia nge-1-0. I-Chiefs ibambane nge-0-0 leqembu laseMorocco, iWydad Casablanca, eFNB Stadium. Amakhosi anqoba kumidlalo yakuqala ekuhambeni nge- 1-0.
Umdlalo wazombili uzakuba mhlaka-17 Ntulikazi eMorocco.
UMosimane uthe ayiqondakali kahle indlela iChiefs edlala ngayo kodwa bazayihlonipha ngokufanele.
“I-Kaizer Chiefs ingelinye lamaqembu amakhulu eSouth Africa nxa ubala ngabalandeli bayo. Bayayidlula iMamelodi Sundowns ngalokho kodwa emnyakeni elitshumi edluleyo iSundowns yiyo elamandla okuqoqa izicoco.
“Liqembu eliyingozi kodwa ayichazeki indlela abadlala ngayo. Baqede endaweni yesitshiya galombili kuligi kodwa sebefike kowamanqamu kuChampions League.
“Bahlelekile, abawangenisi kalula amabhola, ikakhulukazi nxa bedlala ekhaya. Abatshayi amabhola amanengi kodwa ungathuka sebekudlile.
“Batshaye amabhola amane bedlala leSimba, thina asikwenzanga lokho ngakho kumele sibahloniphe.
“Ngingageqa amagula ngeMamelodi Sundowns kumbe i-Orlando Pirates kodwa akukho okunengi engingakutsho ngeChiefs. Angazi ukuthi yini okumele siyilindele kodwa sizobahlonipha,” kutsho uMosimane.
Uthe uyaziqhenya ngokuphinda afake i-Al Ahly emdlalweni wokucina we-Caf Champions League emva kokusithatha lesi isicoco ngesizini edluleyo.
“Sijabule ngokuthi siphinde sangena kowamanqamu kodwa yinto ezihlezi zilindelwe kuleliqembu,” kuqhuba uMosimane.
“Sidlule ebunzimeni sidlala lamaqembu anjenge-Simba, Mamelodi Sundowns leTaraji (Esperance), amaqembu amakhulu e-Africa.
“Sileqembu elihle kodwa sicela abalandeli basibekezelele ngoba asikafiki ezingeni esihlose ukufika kulo. Loba silabadlali abasezingeni eliphezulu, ngikholwa ukuthi leli qembu lisazoba ngcono kulalokhu. Sesingenile kowamanqamu kodwa asikanqobi isicoco. Sizaqhubeka kancane kancane, kutsho uMosimane.
Online Reporter