admin
Ncekwenhle Ncube
KULEXHEGU lelokitshini leTshabalala koBulawayo elileminyaka yokuzalwa engu-60 elilabafazi abane osekuvele ukuba selihluphile ngokuthandana lezihlobo zalo nanko phela litholakale lincinda uluju lwemvelo lomzukulu walo njalo kuzwakale ukuba lithandana loninazala lomlamu walo, uMthunywa uyakuveza lokhu lamhlanje.
Loludaba olwethuse abanengi luvele kuviki edluleyo ngemva kokuba ixhegu leli, uMorgan Ncube ebotshiswe ngabazali bakaMartha Shumba (18) bemethesa icala lokuya emacansini lomzukulu wakhe.
Kubikwa amapholisa ekuhluzisiseni udaba lolu bathole ukuba uNcube ngempela uthandana lomamangala kodwa bathi indaba le kumele ikhulunyiswane njengemuli.
Omunye umfakazi oqotho ongathandanga ukubethwa ngegama uchaze ukuthi lokhu kwenzakala njalo ixhegu leli selihluphile ebafazini babantu osekusenza bacabangele ukuba usebenzisa umuthi.
“Ukhulu lo walala lomzukulu wakhe njalo kukhanya lokhu uhlala ekwenza. Asazi kumbe usebenzisa umuthi ngoba ukwenza kwakhe kuyasimangalisa lathi sikhona lapha.
“Besesithabile sibona ethathwa ngamapholisa manje nanku bamekelile ngoba bethi umzukulu wakhe sekhulile ulelungelo lokuzikhethela akufunayo,” kuchaza umfakazi lo.
Omunye umfakazi othande ukwaziwa ngokuthi nguMaMnkandla nje kuphela uveze ukuthi uNcube uxabanisa umdeni wakubo. Uthe kuvele ukuthi uke walala loninazala ngesikhathi uNkosikazi wakhe engekho.
“Uyayangisa ubaba lo. Sibindi bani umuntu alaso sokulala lezihlobo zakhe. Khathesi uthe ethonisiswa ngodaba lokuthi ulala lomzukulu wakhe kwavela ukuthi wake wathonisiswa futhi ngokuya emacansini loninazala,” kuchaza uMaMnkandla.
UMthunywa uzwe udletshana lokuba uNcube wanxusa uninazala emzini wakhe ngesikhathi unkosikazi wakhe evakatshele kibo eMwenezi. Uthe efika wamqandela endlini yokulala waya laye emacansini.
Ekhuluma lentatheli uyise kamamangala uMnumzana Davison Shumba uchaze ukuthi udaba lokuya emacansini komntanakhe lomkhwenyana luyayangisa.
“Angazi ukuthi yindaba esizayiphatha njani le. Khathesi sisalinde onkosikazi bakhe abane abavela ekhaya ukuthi sikhulumisane labo.
“UNcube ubesithi sikhulumisane thina sodwa simbhadalise lokho esikufunayo sixolisane. Lokhu akwenzileyo kulihlazo emulini lasebantwini esihlala labo,” kuchasisa uMnu Shumba.
Ebuzwa ngaloluduba uNcube uthe kwaphambaniseka lomzukulu wakhe njalo uzimisele ukuthi ahlawule ngenkomo.
“Kwaba liphutha engalenzayo lomzukulu wami. Ukuthi ngalala lomamazala wami ngamanga, abantu balomhawu wokuthi ngizwisisana laye,” kulandula uMnu Ncube.
Ubuye njalo walandula ukuthi uthandana lomlamu wakhe. Uthe abantu bayamhawukela umnawakhe kankosikazi wakhe ngoba bembona emuhle.
“Ngitsho lamapholisa abemhawukela ngesikhathi sisenkambeni. Mina ngimbhadalela imali yesikolo kuphela,” kuphetha uMnu Ncube.
Online Reporter