Online Reporter
UMDLALI wenguqu wakuleli uDivine Lunga useyengeze isikhathi sakhe ekuMamelodi Sundowns ngomnyaka owodwa.
Umqeqetshi uMiguel Cardoso ukhethe ukuthi amnikeze elinye ithuba. Ngokubika kwamaphephandaba eSouth Africa, umqeqetshi lo wenelise ukukhulumisana lenkokheli zeMamelodi Sundowns ukuthi zimgcine umdlali lo ngoba usaselawo amandla enkundleni.
Omunye umfakazi oseduzane leqembu uthe isizatho sokuba khona kukaLunga kuSundowns ngumqeqetshi uCardoso.
“Okuhamba phambili okudale isivumelwano esitsha sikaDivine ngumqeqetshi uMiguel Cardoso. Izinto zatshintsha lapho efika njalo kulapho-ke uDivine aqala khona ukuthola isikhathi sokudlala. Kukholakala ukuthi umqeqetshi wancenga ukuthi uDivine ahlale eqenjini.
“Kubukeka sengathi uhlukile kwabanye abadlali abathathu abasemuva kwesokunxele u-Aubrey Modiba, Terrence Mashego lo-Asekho Tiwani. Yikho umqeqetshi ebona sengathi basamdinga.”
ULunga ungene kuMamelodi Sundowns ngesizini ka-2021 esuka kuGolden Arrows.
Kumkhankaso walisizini umdlalo lo, oleminyaka engu-29 yokuzalwa udlale kakuhle kuSundowns ngemva kokudlala imidlalo engu-17 kuyo yonke imiqhudelwano, waba yinsika endaweni yemvimbi, nanko aMasandawana aze afinyelela ku-final yeCaf Champions League.
Umaneja walumdlali uMike Makaab utshele intatheli ukuthi usasekhona kuMasandawana.
“Ngiyakufakaza ukuthi uDivine Lunga uzahlala kuMamelodi Sundowns enye isizini. Isivumelwano sakhe leqembu sengezwe ngomnyaka owodwa,” kutsho uMakaab.
IMamelodi Sundowns yadlala kwaba yi 1-1 leqembu leGipite iPyramids FC kuhlandla lakuqala leCaf Champions League enkundleni yeLoftus Versfeld mhlaka 24 Nkwenkwezi. Inhlandla lesibili lizadlalwa mhlaka 1 Nhlangula enkundleni ye-30 June Stadium eCairo.
AMasandawana azaphinda adlale lakumqhudelwano weFifa Club World Cup kumalanga alandelayo.
