Online Reporter
Ethel Ncube
BEKUNGABIZWA ozwayo eAcaja duze kweNtabazinduna lapho obekuthakazelwa khona ilanga leAfrica ngoMvulo kuyonale iviki.
Kumcimbi lo bekulabomama akade begqoke baphelela ngemvunulo etshengisa ukuba ngama-Africa, kudliwa ukudla kwesintu njalo kudlalwa imidlalo etshiyeneyo.
Ekhuluma lentatheli uAbednico Dube onguye umnikazi we-Acaja ubike ukuba omama bajabule kakhulu ngosuku lwe-Africa Day.
“I-Africa Day lilanga lokujabulela ubuntu bethu njengama-Africa sithakazelela izinto zakithi sivuselela lamasiko ethu. I-Acaja ibiqoqe umcimbi wabomama wokuthakazelela lelilanga lapha sizama ukubonisa ukubambana, ukusebenza ndawonye lokwazana singabantu abavela endaweni ezitshiyeneyo. Emcimbini lo besilemvuzo esiyiphe omama. Umvuzo wokuqala umama uthole ilembu lakhe lokuthandela (izambiya), amacici kunye lobuhlalu (African necklace), kuthi umvuzo wesibili bekungamacici lezambiya, owesithathu bekuyizambiya kuphela.
“Omama babuye ngobunengi njalo bebetshengisa ukuba bayajabula, baphoxwe yisikhathi nje kuphela masinyane besazijabulela. Ukudla lakho besisidla ukudla kwesintu imfushwa, inkobe, amazambane, umxhanxa kunathwa lamahewu,” utsho njalo.
Ubuye wabonga kakhulu kulabo abenelise ukuza endaweni le.
“Sethula isibongo esikhulu kubo bonke ababuye bazochitha isikhathi lathi sithakazelela ilanga le-Africa Day. Siyabonga kakhulu, lakumnyaka ozayo libuye sizokholisa izinto zesiNtu,” kuphetha uMnu Dube.
