admin
Nobuhle Mgwaqo
KULOSOMABHIZIMUSI weGokwe omiswe phambi kwenkundla yenduna uChireya esetheswa umlandu wokutshontsha amaphenti ngenhloso yokwenza imithanithani yokuhuga amakhasimende esitolo sakhe.
Usomabhizimusi lo odume ngokuthi nguGuma Guma oleminyaka yokuzalwa engaba ngu-45 olamabhizimusi ezitolo esiqintini esingaphansi kukaSobhuku uMasiya khonale koChireya udonselwe edale lenduna ngamanina amane kulandela ukutholakala kwezikhindi zawo ezatshontshwayo.
Kubikwa amanina la acatshelwa yizikhindi zawo okwenza adingisisa ukuba kungani becatshelwa yizikhindi zabo endlini andubana kuvele ukuba usomabhizimusi nguye owazitshontshayo wenza imithi ayigcine esitolo sakhe esidume ngokuthi kukoGuma Guma.
Induna uChireya ithole usomabhizimusi lo elecala lokutshontsha izikhindi zabomama lokuzisebenzisa ukwenza imithanithani yokuhuga amakhasimende ukuze ahlale egcwele esitolo sakhe.
“Usomabhizimusi lo wathuma indodana yakhe efunda uFomu 1 ukuthi iyotshontsha amaphenti abesifazana izomnika. Umntanakhe lo kubikwa wenza njengokulaywa kwakhe nguyise wayatshontsha amaphenti amane awanika uyise wawahlanganisa lemithi ayeyinikwe yinyanga yesigabeni seNebiri esingcelelane laso.
“Loba ebengafuni ukuchaza ukuthi amaphenti la wayewenzani kodwa simvimbezele waze wachaza ukuthi abesilisa bonke nxa owesifazana ehlala phansi bandise ukukhangela behlose ukubona ingasese yabomama (ibheya).
Ngesizatho lesi umuthi kasomabhizimusi lo, lawo kwakumele uhlanganiswe lamaphenti abomama ayabe efuna ukubonwa ngabantu ngokufanayo umuthi lowo ubusenza kugcwale abantu esitolo sikaGuma Guma.
“Abanye bebelanda ukuzothenga kukanti abanye bebesiya buka nje isitolo lesi bedonswa yiwo umuthi lo obusesitolo lesi,” kulandisa induna uChireya.
Induna uChireya ithe loba usomabhizimusi uGuma Guma ebengahlosanga ukubulala kodwa ukusebenzisa umuthi ukuhuga amakhasimende lakho akuqondanga.
Induna uChireya iveze njalo ukuba ngoLwesibili kuyonale iviki kulabaphurofethi abanikwe umthwalo wokuyakhipha umuthi obusesitolo lesi.
“Usomabhizimusi uGuma Guma kazange ale ukuthi umuthi lo ukhitshwe esitolo sakhe kungakho ukhitshwe izolo (ngoLwesibili).
Idale lifice uGuma Guma elecala wahlawuliswa inkomo eyodwa njalo walaywa ukuthi kumele athenge kumbe anike omama abatshontshelwa izikhindi zabo imali eyenela ukuthenga ezinye.
Online Reporter