admin
Ethel Ncube
ITHINTE inyosi enye indoda yakoMbamba eTsholotsho ngemva kokuhlaba inkomo yayo ebigula yathengisela izakhamizi okubangele ukuthi kucine kufe umntwana oleminyaka engu-13, uMthunywa ukuzwile lokhu.
UMnumzana Marikopo Mhlanga wesiqintini seTshetshisa kubikwa uhlabe inkomo yakhe ebigula kumpelaviki edluleyo, mhlaka 6 Lwezi okubangele ukuthi izakhamizi ezine zithwalelwe esibhedlela seTsholotsho lapho okubhubhele khona lo oleminyaka engu-13.
Esinye isakhamuzi esikhulume loMthunywa esingathandanga ukuqanjwa ngebizo siveze ukuba indaba le isegudwini.
“Abantu laba ngomakhelwane bami inkomo yayigula bayihlaba bathengisela abantu isitshebo bathi besanda kuyidla bagula.
“Kwathwalelwa abantu abane esibhedlela seTsholotsho, ababili babengabakoSibanda abanye bengabenye njalo imuli lapho lo oleminyaka engu-13 acina esedlula emhlabeni,” kutsho umfakazi lo.
Intatheli ixhumane lomunye umncedisi wenduna uMnumzana Simon Moyo othe abanye abantu abadla leyonyama lokhu bephathekile.
“Ubaba lo wabulala inkomo yakhe igula wayithengisa kanti sethengisela abantu ukufa. Abanye balaliswa esibhedlela ngikhuluma nje umntwana oyedwa sowedlula emhlabeni.
“Abanye lokhu belalisiwe esibhedlela seTsholotsho abakaphumi,” kubika uMnu Moyo.
Intatheli ixhumane lenduna yakule indawo uGampu yena ochaze ukuba ilusizi ngoba sokulahleke umphefumulo ngenxa yokuthengiswa kwenyama yenkomo ebigula.
“Isenzo sokungananzeleli komnikazi wenkomo sesibangele ukuthi kulahleke umphefumulo. Inkomo nxa igula kumele ibizelwe odokotela bezifuyo hatshi ukuthi umuntu ayibulale ayithengise.
“Ngizahlala lezakhamizi phansi ngizilimukise ngalokhu ngoba kungaba lomthelela omubi. Nxa befisa ukuzibulala kumele bakwenze lokhu isifuyo siqale sahlolwa ngodokotela bezifuyo,” kutsho induna uGampu.
Ekhuluma lephephandaba likazulu uInspector Glory Banda oyisikhulumi samapholisa eMatabeleland North ochaze ukuthi udaba olunjalo balalo.
“Udaba lolu sisaluchwayisisa andubana axwayise uzulu ukuthi angadli inyama engabe ilezibonakaliso zokuthi isifuyo sakhona siyagula,” kuphetha uInsp Banda
Online Reporter