admin
Thokozile Mbedzi
KULENDODA yakoBulawayo efunde isifundo sokuba akuhanjwa kudojwa abafazi emgwaqweni nanko phela icine itshontshelwa imota linina lebusuku ebiliqhatshile.
Indoda le, uElliot Mukaro oleminyaka engu-37 kubikwa uqhatshe inina leli, uCwebisile Hlengiwe Moyo oleminyaka engu-23 yokuzalwa weGranada Flats ocine emtshontshela imota.
Ababili laba kubikwa bahamba bayaqhatsha indawo yokulala ubusuku.
Ekhuluma lentatheli kaMthunywa uNkosazana Malibongwe Mthembo uthe umangele indoda etshontshelwe imota isidinga uCwebisile.
“Ngethukile indoda ebifike loCwebisile elodge isisithi imota yayo isitshontshiwe njalo lomakhalekhukhwini walelonina kasangeni.
“Indoda le yaveza ukuba bavumelana ukuthi bazaqeda ubusuku bonke ngesikhathi eMac’s Garage kungakho bafika batshiya imota phandle bayabhadala e-lodge,” kuchaza uMthembo.
Uthe ababili laba balala ubusuku bonke kodwa kuthe ngehola lesihlanu ekuseni undoda lo uthe ephaphama wabona uCwebisile engasekho lamakhiye emota lawo engekho ezikhwameni zebhulugwe waphuma phandle wathola lemota ingekho.
“Undoda lo kazange aphozise amaseko wahle wayabikela amapholisa yatholakala isitshayelelwe kwenye i-durawall eHillside mhlaka 2 Lwezi.
“UCwebisili waveza futhi ukuthi wayitshayelela ngelanga ayitshontsha ngayo mhlaka 1. Impahla ezaziphakathi wayesezithengisile ezigoqela u-Size 15 commercial black wheel, motor bumper, set yeSilver dolphin pots, lamagilazi konke okubiza iUS$7 480,” kulandisa uNkszn Mthembo.
Isikhulumi samapholisa koBulawayo uInspector Abednico Ncube ebuzwa ngodaba lolu uthe solufikile ehofisini yabo ngakho babonga uzulu ophathise ngombiko wokuba inina leli libotshwe.
“Amapholisa athanda ukubonga uzulu ngokuphathisa ngembiko edale ukuthi umsolwa abotshwe njalo sikhuthaza uzulu ukuba baqhubeke beletha imbiko ukuze silwisane lamacala,” kuphetha ulnsp Ncube.
Online Reporter