Online Reporter
Zimpapers Sports Hub
UKUQHATSHWA komqeqetshi wamaWarriors sekuseduzane nanko inhlanganiso yeZifa ibika ukuba iphezulu kokukhuluma labaqeqetshi abalodumo.
Ukudingwa komqeqetshi omutsha kuza ngemva kokuxotshwa kukaMichael Nees, ngenxa yokwehluleka ukuba lempumela enhle.
Umongameli weZifa, uNqobile Magwizi ubike ukuba umqeqetshi omutsha lo uzabikwa emphakathini ngeviki elizayo. Umsebenzi wakuqala walumqeqetshi yikubumba iqembu eliqinileyo elizancintisa kumqhudelwano we-Africa Cup of Nations (Afcon), eMorocco kusukela mhlaka 21 Mpalakazi 2025 kusiya ku-18 Zibandlela 2026.
IZifa ibika ukuba kube labaqeqetshi abedlula amakhulu amabili abafuna umsebenzi. Phakathi kwabo kulehlekana elaziwa ngokuqeqetsha amaqembu akuligi yeNgilandi, i-EPL, abagoqela uSam Allardyce, Chris Hughton, loHarry Rednapp.
Amanye amabizo aziwayo nguMohamed Fathi oweGipite owake waqeqetsha iHighlanders ngo2009, Winfred Schafer osasengumqondisi wokuqeqetsha eGhana. Omunye ngu-Adel Amrouche osaqeqetsha ilizwe leRwanda.
Kusenjalo, iZifa ibike ukuba isiqedile umsebenzi wokuhlaziya labo abafuna ukukhethwa ezikhundleni kukhetho oluzayo.
“Ikhomithi yezokhetho kuZimbabwe Football Association (ZIFA) ifisa ukwazisa ukuthi ukuhlolisiswa ngobunono kunye lokuqinisekiswa kwamaphepha kukhetho oluzayo lweZIFA kuqedwe kakuhle.” kutsho iZifa ngoLwesine ntambama.
